Búgin Senattyń jalpy otyrysynda ólim jazasynyń kúshin joiý boiynsha zań jobasy Parlament qaraýyna qashan engiziletini aityldy, dep habarlaidy QazAqparat.
«Jyl basynda Qazaqstan ólim jazasynyń kúshin joiýǵa baǵyttalǵan halyqaralyq paktige Ekinshi fakýltativtik hattamany ratifikatsiialady. Ony júzege asyrý turǵysynda Qylmystyq kodekske tiisti túzetýlerdi pysyqtaý talap etildi. Osy oraida bul baǵyttaǵy jumystar qai kezeńde tur?», - dep surady senator Sergei Ershov.
Óz kezeginde QR Bas prokýrorynyń birinshi orynbasary Berik Asylov bul rette zań jobasynyń kontseptsiiasy ázirlengenin atap ótti.
«Kontseptsiia normativti-quqyqtyq aktilerdiń qoǵamdyq portaldarynda talqylandy. Aqpan aiynda vedomstvoaralyq komissiia ótip, Úkimet ony maquldady. Qazirgi kezde Bas prokýratýra tarapynan zań jobasy daiarlandy jáne qujat saraptamadan ótip jatyr. Iaǵni ekonomikalyq, lingvistikalyq, sybailas jemqorlyqqa qarsy baǵyttar boiynsha taldaý jasalady. Tiisti qorytyndyny alǵannan soń, ony Úkimetke, sodan keiin sizderge tanystyramyz. Shamamen mamyr-maýsym ailarynda josparlap otyrmyz», - dedi Berik Asylov senatordyń suraǵanyna jaýap bere otyryp.
Eske salaiyq, 23 qyrkúiekte Birikken Ulttar Uiymynyń shtab-páterinde Qazaqstannyń BUU janyndaǵy Turaqty ókili Qairat Omarov ólim jazasyn joiýǵa baǵyttalǵan Azamattyq jáne saiasi quqyqtar týraly halyqaralyq paktiniń ekinshi Fakýltativtik hattamasyna qol qoidy.
Al, 2020 jyldyń jeltoqsan aiynda Parlament Senatynyń jalpy otyrysynda «Ólim jazasynyń kúshin joiýǵa baǵyttalǵan Azamattyq jáne saiasi quqyqtar týraly halyqaralyq paktige ekinshi Fakýltativtik hattamany ratifikatsiialaý týraly» Zańy qabyldandy.
2003 jyly ólim jazasyn qoldanýǵa moratorii engizilgennen keiin, bizdiń elde joǵary jaza sharasyn qoldanbaýdyń turaqty quqyqtyq rejimi qalyptasqan.
2021 jyldyń basynda Memleket basshysy «Ólim jazasynyń kúshin joiýǵa baǵyttalǵan Azamattyq jáne saiasi quqyqtar týraly halyqaralyq paktige Ekinshi Fakýltativtik Hattamany ratifikatsiialaý týraly» Qazaqstan Respýblikasynyń Zańyna qol qoidy.
