Foto: Ashyq derekkózden
Oligopoliia menshiginen 398 myń gektar jer qaitaryldy. Bul týraly QR Bas prokýrorynyń birinshi orynbasary Timýr Tájimbaev aitty, dep habarlaidy QazAqparat portaly.
«Prezident tapsyrmasy boiynsha aktivterdi qaitarý jáne oligopoliiamen kúres jalǵasýda. Arnaiy komissiia jumysymen memleketke 631 milliard teńge qaitaryldy. Onyń ishinde 400 million dollar qylmystyq qýdalaý aiasynda shetelden qaitaryldy. Oligopoliia menshiginen 398 myń gektar jer qaitaryp aldyq. Onyń baǵasy 6 jarym milliardtan astam teńge turady», - dedi ol Bas prokýratýranyń biylǵy jumysyn qorytyndylaýǵa arnalǵan baspasóz máslihatynda.
Onyń atap ótýinshe, Bas prokýror buryn oligopoliia paidasyna shyǵarylǵan sot sheshimderine narazylyq engizip, nátijesinde Joǵarǵy sot 17 sot aktisiniń kúshin joidy. Sol arqyly 600-den astam temir jol týpikteri qaitaryldy. Jol júrý tarifteri azaidy. 21 milliardtan astam somaǵa memleket múddesi qorǵaldy. Zańsyz alynǵan memlekettik obektilerdi qaitarý týraly prokýratýra bergen 6 talap-aryz qoldaý tapty. Jalpy somasy 14 milliardqa jýyq teńgege prokýratýra bergen talap-aryzdar qaralyp jatyr.
«Qylmystyq jolmen alynǵan tabys jáne aktivterdi qaitarýǵa sheteldik áriptesterimizdi tartyp jatyrmyz. Mysaly, qazan aiynda Kiprmen qylmyskerlerdi berý jáne qylmystyq ister boiynsha kómek kórsetý týraly shart jasaldy. Jalpy qylmystyq-quqyqtyq salada Qazaqstan 34 elmen sharttar bekitti. Olardyń ishinde Qytai, AQSh, Úndistan, Braziliia siiaqty iri elder bar», - dedi Timýr Tájimbaev.
