Qazaqstandyq jeńil atlet, úsh dúrkin Olimpiada júldegeri Olga Rypakova sporttyq mansabyn aiaqtamaitynyn aitty, dep habarlaidy "Ult aqparat".
Osyǵan deiin Olga Rypakovanyń sporttyq mansabyn aiaqtaǵandyǵy týraly habar buqaralyq aqparat quraldarynda taraǵan bolatyn. Alaida jeńil atlet bunyń shyndyqqa janaspaitynyn málimdedi.
«Áleýmettik jelidegi birde-bir jazbamda mansabymdy aiaqtaityndyǵym týraly sóz joq. Sondyqtan jýrnalister men blogerlerdi jalǵan aqparat taratpaýǵa shaqyramyn. Sportshyǵa aýqymdy dodadan keiin demalys kerek. Jeńis pen jeńilisten keiin kelesi synǵa daiyndalý qajet. Men de áli jattyǵyp, túrli básekelerde óner kórsetkim keledi», - dep jazdy ol Instagram jelisindegi jeke paraqshasynda.
Aita keteiik, Tokio Olimpiadasynda úsh qarǵyp sekirýde Olga Rypakova finalǵa óte almaǵan bolatyn.
