Jeńil atletikadan Qazaqstan komandasynyń úzdigi Olga Rypakova Túrkiianyń Belek qalasynda oqý-jattyǵý jiynyn bastady, dep habarlaidy "Ult aqparat".
Qazaqstan jeńil atletika federatsiiasynyń baspasóz qyzmetinen málim etkendei, Olga Rypakova niderlandiialyq maman Henk Kraienhofpen birlesip jattyǵýda.
Tokio Olimpiadasyna daiyndalý maqsatyndaǵy oqý-jattyǵý 16 naýryz - 6 mamyr aralyǵynda ótedi.
Eske salaiyq, Olga Rypakova Olimpiada oiyndaryna joldamany 2019 jyly Almatyda ótken Qazaqstan kýboginde jeńip alǵan bolatyn.
O.Rypakova 37 jasta. 2012 jylǵy London Olimpiadasynyń jeńimpazy, 2008 jylǵy Beijiń Olimpiadasynyń kúmis júldegeri jáne 2016 jylǵy Rio-de-Janeiro Olimpiadasynyń qola medal iegeri.
