QR SIM resmi ókili Aibek Smadiiarovtyń aitýynsha, Iraktan qazaq balalaryn qaitarý operatsiiasy áli júrgizilmegenin málim etti, dep habarlaidy QazAqparat.
«Operatsiia áli ótkizilgen joq. Biz Irak tarapymen kelissóz júrgizip jatyrmyz. Sonymen birge, áleýmettik jáne turmystyq sipattaǵy daiyndyq jumystary pysyqtalýda. Sebebi, kelgennen keiin ol balalardyń barlyǵy «Jýsan» operatsiiasy kezindegidei birden karantinge jatqyzylady. Olardy ońaltý úshin ýaqyt qajet. Olar uzaq ýaqyt boiy qiyn jaǵdaida ómir súrgen. Sol sebepti, jýyq arada operatsiia júrgiziler dep otyrmyz. Naqty ýaqytty biz áli kelisken joqpyz», - dedi Aibek Smadiiarov SIM-de ótken baspasóz máslihatynda.
QR SIM resmi ókili ol jaqtan 2-13 jas aralyǵyndaǵy 10-nan asa bala qaitarylatynyn atap ótti.
«Meniń oiymsha, aldaǵy eki aptanyń ishinde bári atqarylýy tiis», - dedi Aibek Smadiiarov.
Eske sala ketsek, elordada 9 qazanda ótken Eýropadaǵy qaýipsizdik jáne yntymaqtastyq uiymynyń (EQYU) Aýǵanstan boiynsha jiynynda QR Syrtqy ister ministri Muhtar Tileýberdi Qazaqstannyń Iraktan birneshe balany qaitarý baǵytynda jumys júrgizip jatqanyn habarlaǵan bolatyn.
«Olardyń analary sol jaqta ómir boiyna bas bostandyǵynan aiyrylǵan», - degen edi ministr.
