«Nur Otan» partiiasy tóraǵasynyń birinshi orynbasary Muhtar Qul-Muhammedtiń 2016 jyly 18 shildedegi Almatyda bolǵan qaiǵyly oqiǵaǵa qatysty úndeýi jariialandy, — dep habarlaidy kaz.tengrinews.kz tilshisi.
Úndeýde «Nur Otan» partiiasy Almatyda terroristerdiń qolynan qaza tapqan qurbandardyń týǵandary men jaqyndaryna qaiǵylaryna ortaqtasyp, kóńil aitady. «Memleket basshysy eldi dúrliktirgen qandy oqiǵaǵa orai Qaýipsizdik keńesiniń shuǵyl otyrysyn ótkizdi. Onda Elbasy Almatyda jáne búkil elimiz boiynsha qaýipsizdikti qamtamasyz etýge qatysty naqty tapsyrmalar berdi. Prezident qazirgi tańda «qaýeset taratýshylardyń jolyn kesip, arandatýshylardy anyqtaý mańyzdy» ekenin atap ótti. Partiiamyzdyń Tóraǵasy: «Tártipti retke keltirý úshin eń qatań sharalar qabyldanyp jatqanyna halyq senimdi bolýǵa tiis», — dedi. Memleket basshysynyń málimdemesin tolyǵymen qoldai otyryp, biz adamgershilikten ada osynaý terrorlyq aktini jasaǵan qandyqol qylmyskerler barsha Qazaqstan halqyna qarsy shyqty dep sanaimyz. Terrorister qatań jazalanýy tiis», — delingen habarda.
Sonymen qatar, Muhtar Qul-Muhammedtiń aitýynsha, shabýyldaýshylar bizdiń birtutas qoǵamǵa qaýip tóndirip, úrei týǵyzýdy kózdedi. Biraq lańkesterdiń bul áreketterinen túk te shyqqan joq. «Almatydaǵy qaiǵyly oqiǵa qazaqstandyqtardy odan ári biriktire tústi. Birlik, beibitshilik jáne turaqtylyq — bizdiń elimizdiń basty qundylyqtary. Bul qasietti uǵymdarǵa eshkimniń syzat túsirýine quqy joq», — deidi ol.
«Qarapaiym halyqtyń qaýipsizdigi úshin ózderin qurban etken antyna adal politsiia qyzmetkerleri — Qazaqstannyń naǵyz batyrlary. Olardyń erlik áreketteri ójettilik pen erjúrektiliktiń jáne Otany men týǵan halqyna adal qyzmet etýdiń jarqyn úlgisi bolyp qala beredi. Qazaqstan halqy lańkestikke joiqyn toitarys beredi. Bul qylmyskerlerdiń ózderin musylmanbyz dep ataýǵa esh quqy joq. Óitkeni, olar adam óltirip, eń aýyr kúnáni arqalady. Olardyń qanquily áreketteri eshqandai aqtap alýǵa kelmeidi jáne ol múmkin de emes. «Nur Otan» partiiasy barlyq qazaqstandyqtardy terrorizmge qarsy birigýge shaqyrady. Qazaqstan halqy elimizdegi bul qasirettiń tamyryna tek birlik pen birtutastyq arqyly balta shaba alady. Qazirgidei qiyn jaǵdaida azamattarymyzdyń qaiǵyny bólisip, yntymaq pen tatýlyq tanytýy — sonyń aiqyn dáleli», — delingen úndeýde.
