Qaznette oqý aýditoriiasyndaǵy úlken ekranda jynystyq qatynas kórsetilip jatqany týraly video tarady. Jeli qoldanýshylary mundai videolar qazaqstandyq oqýshylarǵa da kórsetiledi degen pikir qaldyryp jatyr, - dep habarlaidy stopfake.kz.
Bul video Ganada medbikelerdi daiarlaý sabaqtarynyń birinde túsirilgen. Iaǵni qatysýshylar mektep oqýshylary emes, stýdentter bolǵan.
Videony stýdentterdiń biri jasyryn túrde túsirip alǵan, ol birden keńinen tarap ketti. Bul Gana turǵyndarynyń arasynda qarama-qaishylyqty reaktsiia týdyrdy, olardyń basym bóligi bolashaq meditsina qyzmetkerlerin daiarlaý sapasy nashar dep málimdedi.
Alaida, mundai videolar qazaqstandyq oqýshylarǵa kórsetiledi dep aitýǵa negiz joq.
Buǵan deiin Bilim jáne ǵylym ministrligi ata-analardyń otandyq mektepterdegi balalarǵa jezókshelik, bir jynysty qarym-qatynas jáne jynystyq zorlyq-zombylyq týraly aitylatyny týraly teoriialaryn birneshe ret joqqa shyǵarǵan bolatyn.
Sondai-aq «orta bilim berý uiymdarynda balalar men jasóspirimderdiń urpaqty bolý densaýlyǵyn nyǵaitý «Azamattardyń urpaqty bolý quqyqtary jáne olardy júzege asyrý kepildikteri týraly» Qazaqstan Respýblikasynyń Zańyna, «Halyq densaýlyǵy jáne densaýlyq saqtaý júiesi týraly» Qazaqstan Respýblikasynyń Kodeksine, Qazaqstan Respýblikasyndaǵy adamgershilik-jynystyq tárbie jónindegi tujyrymdamaǵa jáne Qazaqstan Respýblikasynyń 2020-2025 jyldarǵa arnalǵan «Densaýlyq» memlekettik baǵdarlamasyna sáikes iske asyrylady» dep habarlady vedomstvodan.
Sonymen qatar, QR BǴM habarlaýynsha, mektep oqýshylaryna reprodýktivti densaýlyq týraly qajetti bilimdi «Himiia», «Biologiia», «Tirshilik qaýipsizdigi negizderi» jáne basqa da pánder baǵdarlamalary sheńberinde alǵan.
Qoryta aitqanda, taratylǵan video Ganada túsirilgen, ony mektep oqýshylaryna emes, meditsina stýdentterine kórsetken. Onyń Qazaqstanǵa qatysy joq. Demek, mundai videolardy bizdiń oqýshylarǵa da kórsetýi múmkin degen pikirler jalǵan.
