Elordanyń bilim basqarmasy qashyqtan bilim alý úshin taratylǵan internet roýterdiń trafigi nege tez taýsylatynyn túsindirdi, dep habarlaidy Sputnik Qazaqstan.
Basqarma basshysy Sholpan Qadyrovanyń aitýynsha, búginde roýterlerdiń internet trafigine qatysty másele týyndap otyr. Ata-analar bir aiǵa berilgen internettiń ne sebepti on kúnniń ishinde taýsylyp qalatynyn suraidy. Osy oraida bir oqýshyǵa naqty qansha megabait beriletinin bilgisi keledi.
"Biz qashyqtan oqytýdy qamtamasyz etý maqsatynda 22 600 roýter satyp alyp, oqýshylar men pedagogtarǵa ýaqytsha paidalanýǵa berdik. Internet trafigi ai saiyn 70 gigabait. Oǵan qosa, otandyq bilim berý resýrstaryn tegin paidalanýǵa bolady", - dedi Qadyrova onlain brifingte.
Onyń sózine qaraǵanda, on kúnniń ishinde trafiktiń taýsylyp qalý jaǵdailary bar. Osyǵan bailanysty provaiderlermen birge tekseris jasaldy.
"Tekseris barysynda oqýshylardyń, ata-analardyń nemese basqa adamdardyń internetti orynsyz paidalanatyny, oqý protsesine qatysy joq saittarǵa kiretini anyqtaldy. Mysaly, Youtube-tan video kórý, túrli áleýmettik jelilerge kirý, filmder qaraý jáne taǵy basqasy bar", - dedi Qadyrova onlain brifingte.
