Kókshetaý qalasynyń mektep basshylary oqýshylardyń ata-analaryn balalardy áleýmettik jeli arqyly ózine tartatyn qaýipti oiyndarǵa nazar salýǵa shaqyrdy, - dep habarlaidy Tengrinews.kz tilshisi.
"Mundai oiyndardy uiymdastyrýshylar balalardy jabyq toptarǵa aldap qosyp, ol jerde túrli syltaýmen ólimge soqtyratyn fleshmobqa qatysýǵa shaqyrady", - dep jazypty joldaý avtorlary.
Olar balanyń osyndai oiynnyń shyrmaýyna ilingenin bildiretin belgilerdi anyqtaǵan: - Qara tústi kiim tańdaý, ólimmen astasatyn simvoldary bar bolýy múmkin; - Syrt kelbetiniń kúrt ózgerýi: smaiyn qyryp tastaý, shashyn tabiǵi emes túske boiaý; - Uiqynyń buzylýy: maýjyrap júrý nemese uiqynyń joǵalýy; - Denesinde tilingen izderdiń, kúiýi nemese denege jaraqat salýdyń ózge belgileriniń (tyrtyq, oiyq, tilý, tesý) bolýy; - Únemi virtýaldy ómirde júrýi, jeli arqyly hat almasýǵa qatty kóńil bólý (kóbine beitanys adamdarmen); - Devaistaryna qoljetimdiliktiń bolmaýy, kompiýterge qosymsha qupiia sóz ornatý, paraqshany anonim qaraýǵa múmkindik beretin braýzerlerdi qoldaný; - Msitikalyq filmderge jáne qatygezdik kórsetilgen tustaryna qyzyǵý; - Ózgeshe simvoly bar tatý saldyrýǵa degen aiaq asty qulshynys; - Ata-anasymen qarym-qatynastan qashý jáne kóńil-kúiin jasyrý; - Jelilerden qaýipti belgilerdiń paida bolýy: Áleýmettik jelidegi kúizelisti bildiretin postardyń paida bolýy, óz paraqshasynda ólimge bailanysty túnergen beineler men dáieksózderdiń paida bolýy.
"Sýretterde betin qolmen nemese kiimmen qalqalaý, osyndai sýretterde suq saýsaǵyn kórsetý, bul ózine qol salýdy meńzeitin fotosýretter. Medýza, mysyq, kóbelek, edinorog, biikten, tóbeden túsirilgen sýretter jáne joǵary júzip bara jatqan kitterdiń beinesi qaýipti esepteledi. Áleýmettik jelidegi paraqshasynda túnergen mýzykany saqtaý, sýitsidke beiimdilikti anyq bildiredi. Eger balańyzdan joǵaryda kórsetilgen belgilerdiń bireýin bolsa da baiqap, onyń ólim tobyna múshe bolǵanynan seziktenip júrseńiz, oǵan daýys kóterip, dereý doǵarýdy talap etpeńiz. Kez kelgen kikiljiń oiyna alǵanyn júzege asyrýǵa itermeleýi múmkin. Bastysy birden mektep psihologyna habarlasyńyz", - dep ótinipti mektep basylary ata-analardan.
