1 qyrkúiekke deiin aimaq ákimdikteri qosymsha kompiýter satyp alady. Bul týraly Ortalyq kommýnikatsiialar qyzmetinde ótken onlain brifingte QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Jańa oqý jylynyń birinshi toqsany aiaqtalǵanda dástúrli oqý formatyna qaita kóshý-kóshpeý jaǵy belgili bolady. Bul jumys epidemiologiialyq jaǵdaiǵa bailanysty kezeń-kezeńimen júrgiziledi. Qashyqtan oqýǵa daiyndyq jumystary qalai júrip jatqany óte mańyzdy. Ótken oqý jylynyń tórtinshi toqsanynda kóptegen máselege tap boldyq. Ol kezde jiberilgen qatelikterdi osy joly eskeremiz», - deidi Bilim jáne ǵylym ministri Ashat Aimaǵambetov.
Onyń aitýynsha, qazirgi ýaqytta kompiýterge qatysty aýqymdy jumys atqarylyp jatyr.
«Bizde eskirgen kompiýter kóp. Qajet etetin oqýshylarǵa ýaqytsha bere turýǵa bolatyn kompiýter az. Sondyqtan qazirgi ýaqytta 36 myńnan astam kompiýter satyp alyndy. 1 qyrkúiekke deiin aimaq ákimdikteri qosymsha kompiýter satyp alady. Búgin Úkimet otyrysynda osyndai tapsyrma berildi», - dedi ol.
