Bilim jáne ǵylym vitse-ministri Ashat Aimaǵambetov Pedagogtar mártebesi týraly zańda qandai máseleler qamtylatynyn aityp berdi, dep habarlaidy "Ult aqparat".
«5 qazanda Elbasynyń Qazaqstan halqyna Joldaýynda muǵalimderdiń máselesi keńinen kóterilgenin bilesizder. Eń basty nazar aýdararlyq jai - kópten beri bizdiń ustazdarymyzdyń kókeiinde júrgen máseleler aityldy. Sonyń biri - Pedagogtardyń mártebesine qatysty. Bul rette osy zalda kóptegen áriptesterimizdi kórip otyrmyn. Rektorlar, direktorlar on jyl boiy Pedagogtardyń mártebesi týraly zańdy qabyldaiyq dep, máseleni ár alqa májilisinde kóterip júrgen bolatyn. Sondyqtan, Elbasy osy zańdy qabyldaý týraly tapsyrma berdi», - dedi Ashat Aimaǵambetov Astanada ótip jatqan «Nur Otan» partiiasy bastaýysh uiymdarynyń respýblikalyq forýmynda.
Vitse-ministr óz sózinde atalmysh jańalyqtyń jaǵymdylyǵyn birden baiqaǵanyn aitady.
«Barlyq áleýmettik jelilerde búgingi kúnge deiin osy másele talqylanyp jatyr. Bul shyn máninde, bilim salasyn - taǵy bir úlken satyǵa kóteretin suraqtardyń biri. Bul zańda pedagogtardyń áleýmettik mártebesin kóteretin stimýldar, oqý júktemesin azaitý, kerek emes tekserý komissiialarynan qorǵaý, taǵy basqa máselelerdi kóteretin bolamyz. Men osy minberdi paidalana otyryp, sizdermen birge osy zańdy talqylaýǵa qatysýlaryńyzdy suraǵym keledi. 2 kún osynda bolasyzdar. Bizge beretin usynystaryńyz bolsa, óte riza bolar edik. Qazir biz áleýmettik jelide de, gazet pen saittar arqyly da usynystardy jinap jatyrmyz. Eki-úsh aidan keiin tujyrymdamany jasap, jan-jaqty halyqpen talqylap, Parlamentke zań jobasyn engizetin bolamyz», - dedi Ashat Aimaǵambetov.
Vitse-ministrdiń aitýynsha, atalmysh zań jobasynda talqylanatyn máselelerdiń biri - júktemeni azaitý.
«Ózderińiz biletindei, TMD elderiniń ishinde biz balalarǵa salynatyn júktemesi jaǵynan sózsiz chempionbyz. Máselen, 11 synyptarda - 39 saǵat (...) Bul óte kóp. Álbette, 50-60 saǵatqa deiin uzartýǵa bolar, biraq bul qadam sapaǵa qanshalyqty áser etedi. Mine, sondyqtan, Memleket basshysy júktemeni azaitý qajettigin aityp otyr. Biz balalardyń júktemesin azaita otyryp, muǵalimderdiń saǵaty, júktemesi, ailyǵy máselesin sheshemiz. Atalmysh zań jobasy aiasynda pedgogtardyń júktemesin de azaitý kózdelgen. Qazir bir stavkanyń - 18 saǵat ekenin bilesizder. Biz ony 16 saǵatqa azaitýdy kózdeýdemiz», - dedi vitse-ministr.
Eske sala ketsek, elordadaǵy Kongres-ortalyqta «Nur Otan» partiiasynyń bastaýysh uiymdarynyń respýblikalyq forýmy ótip jatyr.
