QR BǴM Mektepke deiingi jáne orta bilim komitetiniń tóraǵasy Maira Meldebekova oqýshylar IV toqsannyń jiyntyq baǵalaýyn (TJB) qashan tapsyratynyn aitty, dep habarlaidy QazAqparat.
«Bólim boiynsha jiyntyq baǵalaý (BJB) ótkizý merzimi aptasyna 2 jáne odan kóp saǵatty quraityn pánder boiynsha 4-11 mamyr aralyǵynda ótedi. Jalpy, biz munyń aldynda Bilim jáne ǵylym ministrliginiń №135 buiryǵynda 4-8 mamyr dep belgilegen edik. Qazir merekelik datalarǵa sáikes kelýine bailanysty 11 mamyrǵa deiin uzarttyq. Aptasyna bir saǵatty quraityn oqý pánderi boiynsha 11-15 mamyr aralyǵynda jáne 1-10 synyptarda toqsandyq baqylaý, sonymen qatar 11-synyptarda baqylaý jumysy 18-22 mamyr aralyǵynda ótedi. Jalpy, BJB jáne TJB tapsyrmalarynyń barlyǵyn muǵalimder ózderi ótken taqyryp boiynsha daiyndaidy», - dedi Maira Meldebekova onlain-suhbat barysynda.
Onyń aitýynsha, oqý pánderi boiynsha 1-10 synyptarda júrgiziletin jiyntyq baqylaý kestesin árbir bilim berý uiymy jeke daiyndaidy.
«BJB ótkizý ýaqytyn 20 minýt, TJB ýaqytyn 40 minýt dep belgilep otyrmyz. Sonymen qatar 1-4 synyp oqýshylarymyz jas erekshelikterine qarai, tehnologiialardy áli de tolyq meńgermeýine bailanysty ýaqyt shektelmeidi. Ata-analarǵa da, oqýshylarǵa da aitarymyz, qazirgi sabaq barysy, qashyqtan oqytý júiesi qalai ótip jatsa, BJB da, TJB da solai ótedi», - dedi komitet tóraǵasy.
