QR Bilim jáne ǵylym ministri oqýlyqtardaǵy qatelerdi taldap berdi, dep habarlaidy "Ult aqparat".
«Orys ádebieti» oqýlyǵyn paraqtap kóreiik. Qarapaiym qateler. Fizikadan da solai. Eseptiń kórsetilgen jaýaby teris. Mysaly, munda 0,24 dep kórsetilgen. Al esepti durys sheshseńiz 0,27 degen san shyǵýy kerek. Geografiia oqýlyǵy da sondai. Kartalar boiynsha qatelikter bar. Aǵylshyn tili oqýlyǵynda aýdarma maǵynasy ózgerip ketken. Mátindi maǵynasyna qaramai sózbe-sóz aýdarý kóp kezdesedi. Balalar sol qatelik boiynsha qatege úirenip jatyr degen sóz», - dedi vedomstvo basshysy.
Ministr orys tilinen qazaqshaǵa aýdarylǵan oqýlyqtardyń sapasyn da synǵa aldy.
«Mundaiǵa jol berilmeýi kerek. Balalarymyz osyndai aýdarmalarmen oqýǵa májbúr. Jyl saiyn bir qatelik qaitalanyp keledi. Bir basqan shoqty qaita ainalyp basamyz. Qashan bitedi bul? Oqýlyqty asyǵys daiyndaý degen júieli problemaǵa ainaldy», - dedi Ashat Aimaǵambetov.
Sondai-aq, ol oqýlyq avtorlary men sarapshylary arnaiy kýrstan ótetinin málim etti
«Jaqsy muǵalimniń bári oqýlyq jaza almaidy. Onyń óz zańdylyqtary men talaptary bar. Oqýlyq jazý men monografiia jazý eki bólek dúnie. Osyny eskermegendikten, bizdiń balalarǵa usynatyn oqýlyqtarymyz monografiia siiaqty bolyp ketip júr. Ondai oqýlyqty balanyń túsinýi qiyn. Sondyqtan, oqýlyq avtorlarynyń ózin oqytý kerek», - dedi Ashat Aimaǵambetov.
Áýeli oqýlyq sapasyn saraptaityn mamandar oqytylatyn bolady. Sol úshin eldegi 1000 úzdik muǵalim iriktelip, arnaiy kýrstan ótedi.
«Jyl saiyn arnaiy kýrstan ótken sarapshylardyń ishinen úzdikteri jasyryn ádis arqyly tańdap alynady. Osydan keiin oqýlyq avtorlaryn oqytamyz. Bizde avtorlar kóp emes, sonda da oqytamyz», - dedi vedomstvo basshysy.
Ashat Aimaǵambetov oqýlyqty saraptaý júiesi qalai jumys isteitinin túsindirdi.
«Sarapshylar oqýlyqty baǵalaý úshin bas qalaǵa eki ret keledi. Ár kelgende bir apta ǵana ýaqyt beriledi. Olarǵa úlken oqýlyq ustatady. Elordada otyryp, bir aptanyń ishinde ony saraptap shyǵý múmkin emes. Oqýlyqty tolyq saraptaý úshin sýretterin, kartalardy, kestelerdi, esepter men onyń sheshý joldaryn, jalpy mazmuny men pýnktýatsiiasyn tekserip shyǵý kerek. Osynyń bárin bir aptada tyndyrý qanshalyqty múmkin? Mundai júie bizge unamaidy. Sarapshylar oqýlyq synaqtan ótpei turyp maketimen tanysýy kerek. Ol úshin arnaiy elektrondy platforma qurylady. Sol arqyly aqparat almasyp, júieli negizde jumys isteitin bolamyz», - dedi ministr.
Barlyq quqyqtar qorǵalǵan. inform.kz belsendi siltemeni paidalanyńyz https://www.inform.kz/kz/ministr-okulyk-sarapshylary-kalay-iriktelu-kerektigin-aytty_a3554754
