QR BǴM Ulttyq testileý ortalyǵynyń direktory Didar Smaǵulov "UBT-ǵa 11-synyptyń tórtinshi toqsanyndaǵy taqyryptardan suraq qosyla ma" degen saýalǵa jaýap berdi, dep habarlaidy "Ult aqparat".
Buǵan deiin birqatar ata-ana 11-synyptyń sońǵy toqsany onlain ótkendikten, balalar testileýdi durys tapsyra almaidy dep alańdaǵan edi.
«Keibir tilshiler UBT-da 11 synyptyń tórtinshi toqsanyndaǵy sabaqtardyń suraqtaryn alyp tastaidy dep sózimdi basqasha jetkizgen tárizdi. Sony naqtylap óteiin. Biz 11 synyptyń 4 toqsanyndaǵy taqyryptardy qaradyq. Olardyń barlyǵy - 9,10 synyptarda, tipti 7,8 synyptarda ótken taqyryptardy qaitalaý. Barlyq pán boiynsha solai. Sondyqtan tórtinshi toqsanda jańa taqyryp joq, sáikesinshe suraqtar da qiynǵa soqpaidy. Oqý baǵdarlamasynda joq suraq testileýde de bolmaidy, onyń bárin jiti tekserip otyrmyz. Ata-analarǵa ýaiymdamańyzdar degimiz keledi», - dep túsindirdi Didar Smaǵulov.
