Ulttyq qundylyqtardy dáripteýde bilim berý salasyna úlken jaýapkershilik júkteledi. Mundai pikirdi QR Parlamenti Senatynyń tóraǵasy Máýlen Áshimbaev bildirdi, dep habarlaidy "Ult aqparat".
«Ulttyq qundylyqtardy dáripteý qashanda ózekti. Ásirese, qazirgidei jahandaný dáýirinde onyń mańyzy zor. Búgin Senatta osy taqyrypta parlamenttik tyńdaý ótkizip, atalǵan máseleni jan-jaqty talqyladyq. Jalpy, ulttyq qundylyqtardyń aýqymy keń. Onyń táýelsizdik, jer, til, mádeniet, salt-dástúr siiaqty basymdyqtardyń bárin qamtityny belgili. Sondai-aq, bul turǵyda adami qundylyqtardyń da máni erekshe. Osy rette Memleket basshysy «Abai jáne HHI ǵasyrdaǵy Qazaqstan» atty maqalasynda nazar aýdarǵan uly oishyldyń «Tolyq adam» tujyrymdamasyn airyqsha atap ótýge bolady», - dep jazdy Senat tóraǵasy Facebook paraqshasynda.
Onyń atap ótýinshe, Abaidyń «Tolyq adamyna» nurly aqyl, jyly júrek jáne ystyq qairat tán. Nurly aqylǵa sáikes biz qoǵamda bilim kýltin qalyptastyrýymyz kerek. Ásirese, ómir boiy bilim alý daǵdysyn negizgi qaǵidatqa ainaldyrǵan jón. Jyly júrekten bastaý alatyn ózara senim, janashyrlyq pen jaýapkershilik sekildi qundylyqtardy da keńinen dáriptegen abzal. Ystyq qairatqa jatatyn talap pen eńbekqorlyq ta jańa zamanda ulttyq ustanymǵa, ómirlik maqsatqa ainalýy qajet.
«Ulttyq qundylyqtardy dáripteýde bilim berý salasyna úlken jaýapkershilik júkteledi. Óitkeni bizdiń ulttyq tanymda bilim árdaiym tárbiemen qatar júrgen. Sondyqtan bala adamdyq álippesin ata-anasymen qatar mektepten de úirengeni jón. Bilim mekemeleri adal, jaýapty, eńbekqor bolýdy erte jastan balanyń boiyna sińirýge tiis. Sol sebepti, oqý baǵdarlamasyn osy baǵytta jańasha jasaqtaý máselesin qaraǵan jón bolar edi. Bul iste intelligentsiianyń da róli zor. Ziialy azamattarymyz qashanda qoǵam úshin baǵdar bolyp keledi. Sol úshin olarǵa alǵysymyzdy bildiremiz. Endigi kezekte, elimizde ziialy qaýymnyń jańa býynyn qalyptastyrýǵa mán bergen durys dep esepteimiz. Olar HHI ǵasyrda ulttyq qundylyqtardy saqtaýshy jáne nasihattaýshy bolýǵa tiis», - dedi Máýlen Áshimbaev.
Senat spikeri qazirgidei jahandaný zamanynda ulttyq qundylyqtardy dáripteýdiń mańyzy burynǵydan da artyp otyrǵandyǵyna basa nazar aýdartady.
«Tipti, ulttyq qundylyqtardy dáriptemei tolyqqandy damý múmkin emes deýge bolady. Sondyqtan búgin aitylǵan usynys-pikirlerdiń bári Senattyń aldaǵy jumysynda eskeriledi. Tyńdaý qorytyndysy boiynsha arnaiy usynymdar daiyndalyp, Úkimetke jáne tiisti ministrlikterge jiberiledi. Onyń iske asyrylýy senatorlardyń baqylaýynda bolady», - dedi ol.
