Foto: Oqý-aǵartý ministrligi
Elimiz boiynsha 25 qyrkúiek pen 5 qazan aralyǵynda «Ustaz - ult shamshyraǵy» onkúndigi ótedi. Bul týraly Oqý-aǵartý ministrliginiń baspasóz qyzmeti habarlady.
Onyń aiasynda óńirlerde kún saiyn pedagogterge arnalǵan merekelik jáne taqyryptyq is-sharalar uiymdastyrylady. Bul bastama pedagog mártebesin kóterýge, ustaz mamandyǵyn keńinen nasihattaýǵa, onyń qoǵamdaǵy erekshe rólin basa kórsetýge baǵyttalǵan.
Ustazdyq - mamandyq qana emes, uly missiia. Pedagogter óskeleń urpaqty tárbielep, ulttyń ziiatkerlik áleýetin qalyptastyrady, ár balanyń óz jolyn tabýyna kómektesedi. Qazirgi tańda elimizdegi 22 myńnan asa bilim berý uiymynda 6 millionǵa jýyq oqýshyǵa 600 myńnan astam pedagog bilim berip jatyr.
Oqý-aǵartý ministrligi «Ustaz - ult shamshyraǵy» onkúndigi aiasynda «Ustazyńdy quttyqta!» chellendjin jariialaidy. Bul sharanyń maqsaty ár balaǵa tálim men tárbie, ónege bergen, onyń tulǵalyq qalyptasýyna úles qosqan ustazǵa alǵys pen qurmet sezimin bildirý.
Chellendjge barlyq niet bildirýshi qosyla alady, ol úshin:
* áleýmettik jelilerde #Ustazyńdyquttyqta #PozdravÝchitelia heshtegterimen quttyqtaý jariialańyz;
* óz ustazyńyzǵa qońyraý shalyp, jyly lebizińizdi bildirińiz;
* quttyqtaý hatyn jiberip, esteliktermen bólisińiz.
Eske sala keteiik, 2023 jyldan beri Qazaqstanda Ustazdar kúni resmi túrde 5 qazanda atap ótiledi. Bul kúni elimizdiń túkpir-túpirinde ustaz eńbegin ulyqtaýǵa arnalǵan ártúrli merekelik sharalar ótedi.
