90 paiyz ókpeniń zaqymdanýymen aýrýhanaǵa túsken tarazdyq dertti jeńip shyqty, dep habarlaidy QazAqparat.
Taraz qalasynyń jastaǵy turǵyny, óziniń týǵan kúninde qalalyq kópbeiindi aýrýhanadan saýyǵyp shyqty. Týra bir ai boiy koronavirýspen alysqan ol, shilde aiynyń ortasynda ókpesiniń 90 paiyz zaqymdanýymen aýrýhanaǵa aýyr halde túsken. Eki apta boiy jansaqtaý bóliminde jatyp, jasandy jeldetý apparatynda bes kún, ókpeni invazivti emes jeldetý apparatynda úsh kún em qabyldaǵan.
«Koronavirýsqa shaldyqqan naýqastarmen tikelei qarym-qatynasqa túsken joqpyn, degenmen ózim bazarda saýda-sattyqpen ainalysamyn, onda adam kóp, olardyń virýs juqtyrǵan-juqtyrmaǵanyn bilmeisiń. Shildeniń basynda aýyryp qaldym. Dertti bazardan juqtyrdym, sebebi qonaqqa barǵan joqpyz, jaqyndarymdy kórmegeli birneshe ai boldy. Tek telefon arqyly habarlasyp turamyz. Aldymen álsirep, tońyp, dirildei bastadym.
Birneshe kúnnen keiin iis pen dám sezbei qalǵanymda, Covid juqtyrǵanymdy túsindim. Úide birneshe kún emdelip, jótel údep, qan aralas qaqyryq shyqqan soń, jedel járdemmen aýrýhanaǵa keldim. Men óz-ózime kele almai, tynys alý apparatynda jatyp, o dúnieni kórdim desem bolady. Maǵan ekinshi ómir syilaǵan aq halatty abzal jandarǵa myń alǵys.
Kovidke áli de senbeitin adamdarǵa aitarym: vaktsina saldyrtyńyzdar, densaýlyqqa artyq qaýip tóndirýdiń qajeti joq», – deidi ol.
«Patsienttiń saýyǵýy bir ǵana dárigerdiń emes, naýqastyń óziniń emdelýge degen yntasyna da bailanysty. Koronovirýspen aýyrǵan adam bar kúshin osy dertti jeńýge jumsaýy tiis. Aǵza álsirep qalady, sondyqtan ózin-ózi kútip, qalypqa keltirý qajet. Ol úshin toi-tomalaqtan, jiyndardan, adam kóp shoǵyrlanatyn oryndardan bas tartý kerek. Dárýmenge bai tamaqtardy iship, uiqyǵa mán berý, taza aýada serýendeý, sportpen shuǵyldaný, salaýatty ómir saltyn qalyptastyrýǵa kóp kóńil bólý kerek», – deidi emdeýshi dáriger Parida Qurmanbaeva.
Aýrýhana qyzmetkerleri aýrýynan aiyǵyp shyqqan týǵan kún iesin úiine shyǵaryp saldy ári ony dúniege kelgen kúnimen quttyqtady.
