Ońtústik Qazaqstan oblysynda Elbasynyń «Bolashaqqa baǵdar: rýhani jańǵyrý» baǵdarlamalyq maqalasyn túsindirý maqsatynda jastarmen kezdesý ótti. «Intellekt-Ekspert» ekonomikalyq-áleýmettik zertteýler ortalyǵy muryndyq bolǵan sharada qazaqy bolmys, onyń ulttyq kody taqyryptarynda tereń áńgime órbidi, dep habarlaidy QazAqparat tilshisi.
Jiynda jastardyń boiyndaǵy ulttyq qundylyqtarǵa basa nazar aýdaryldy. Elbasy maqalasy búgingi qoǵam úshin mańyzdy baǵdarlamalyq mánge ie bolsa, ulttyq sananyń jańǵyrýy men qazirgi jastar tárbiesi kezdesýdiń basty taqyrybyna ainaldy. Latyn álipbiine kóshý eń aldymen, qazaq tiliniń áýezdiligin saqtaidy. Al bul memlekettik tildiń mártebesin kóterýge negiz.
«Eldiń ekonomikasy men áleýmettik jaǵdaiy durys bolsa, árine sol jaǵdaiǵa sana da beiimdelip, ózi ózgeredi. Óitkeni, rýhani jańǵyrýdyń negizgi formýlasy, ol ne? Ony adam balasy ózinen bastaý kerek. Qoǵamdyq sanany ózgertý úshin, ár azamattyń sanasy ózgerýi tiis. «Tsifrlyq Qazaqstan» baǵdarlamasy, «Kóshi-qon», «Órleý», «Nurly jol», «Serpin» siiaqty memlekettik baǵdarlamalardy qalyń halyqqa túsindirý basty maqsatymyz», - deidi «Intellekt-Ekspert» ekonomikalyq-áleýmettik zertteýler ortalyǵynyń direktory Sattar Májitov.
Mamandardyń pikirinshe, mundai kezdesýlerdiń jastarǵa tálimi mol. Óitkeni óskeleń urpaq ótkeninen ónege túiip, bolashaǵyna boljam jasai alýy tiis. Kezdesý barysynda qatysýshylar da óz usynystaryn bildirdi. Olardyń paiymynsha rýhani jańǵyrýdy árbir azamat ózinen bastap, árbir sana jańǵyrýǵa beiimdelýi kerek.
Jalpy jyl sońyna deiin jalǵasatyn joba aiasynda birqatar zertteý jumystary da júrgizilmekshi. Olar Elbasy maqalasy jolymen etnosaralyq qarym-qatynasty nyǵaityp, rýhani qundylyqtardy jańǵyrtatyn bolady.
