Ońtústik Qazaqstan oblysynyń sharýalary 328 myń tonna shitti maqta jinady. Bul ótken jylmen salystyrǵanda 41 myń tonnaǵa artyq. Ortasha túsimdiligi gektaryna 24,5 tsentnerden jinalǵan aq altynnyń 196,6 myń tonnasy nemese 60 paiyzy mashinamen terildi. Iaǵni, maqta alqaptarynda 500 den astam kombain terý jumystaryn júrgizdi. Búginde jiyn-terim naýqany tolyǵymen aiaqtaldy, dep habarlaidy Ult.kz tilshisi.
Elimiz boiynsha aq altynnyń 100 paiyzy Ońtústikte óndiriledi. Al, maqta daqylyn ósirýmen oblystaǵy 10 aýdannyń sharýalary ainalysyp keledi. Maqta daqyly eksporttyq mańyzǵa ie bolǵandyqtan egis kólemi jyldan jylǵa artyp keledi. Máselen, biyl Ońtústikte 134,6 myń ga jerge shitti maqta egilse, bul ótken jylmen salystyrǵanda 25 myń ga artyq. Kóktemniń kesh túsýi men aýa raiynyń qolaisyzdyǵyna bailanysty biyl maqta terý jumystary qarasha aiynyń 20-syna deiin sozyldy.
Maqtaaral aýdanyna jasaǵan bir saparynda oblys ákimi J.Túimebaev Ońtústik Qazaqstan oblysynyń brendi sanalatyn maqta daqyly básekege qabiletti bolý qajettigin aitqan bolatyn. Sondai-aq, ol, elimizdegi úlken tabys ákeletin júz jyldyq tarihy bar maqta daqylynyń sapaly sorttaryn damytyp, innovatsiialyq tehnologiialardy óndiriske endirý arqyly aq altyndy óndirýdiń tiimdiligin arttyrýdy aitqan-dy.
Maqta elimizdegi eksporttyq basymdyqqa ie daqyldardyń qatarynda. Sondyqtan maqtanyń sapasyn joǵarlatýǵa erekshe mán berilgen. Búginde Ońtústik sharýalary jańa tehnologiialardy qoldaný men izdenistiń arqasynda maqta talshyǵynyń 10 surypyn jasap shyǵarǵan. Maqtanyń mundai elitaly suryptarynyń túsimdiligi 38-40 ts/ga deiin jetedi. Búginde Ońtústik Qazaqstanda óndiriletin maqta talshyǵynyń joǵary suryptary Resei, Belarýssiia, Germaniia, Latviia, Moldova, QHR, Belgiia, Iran, Ýkraina, Italiia jáne Ońtústik Koreia syndy 10 memleketke eksporttalýda. Jyl basynan beri atalǵan elderge 30 myń tonnaǵa jýyq maqta talshyǵy jóneltilgen.
Maqta sharýashylyǵyn qoldaýǵa memleket tarapynan erekshe nazar aýdarylǵan. Maqta daqylyn ósirý úshin tyńaitqyshtar men gerbidtsitterge memleket tarapynan sýbsidiia beriledi. Odan bólek, egilgen maqtanyń árbir gektaryna 15 myń teńgeden, al qaita óńdeý úshin ótkizilgen aq altynnyń ár tonnasyna 6 myń teńgeden qarjylai qoldaý kórsetiledi. Búginde maqta sharýashylyǵyn qoldaý úshin sýbsidiialar taratylýda. Jyl basynan beri oblys boiynsha 134,6 myń gektarǵa 2 mlrdqa jýyq, qaita óńdeý kásiporyndaryna ótkizilgen 140 myń tonna aq altynǵa 833 mln teńge sýbsidiia tólengen.
