Biyl Ońtústik Qazaqstan oblysy Sairam aýdanynda 52 mlrd. teńgeniń aýyl sharýashylyǵy ónimi óndirilgen. Al egistik kólemi 49 myń gektarǵa jetip, tamshylatyp sýarý ádisi 624 gektarda qoldanylýda. Bul jetistikterdi aldaǵy jylda da arttyra túsý úshin, aýdanyń potentsialyn barlyq salada tiimdi paidalýymyz qajet. Búgin bul týraly Sairam aýdanynda ótken «Altyn kúz» merekesine qatysqan oblys ákimi Janseiit Túimebaev málim etti, dep habarlaidy Ult.kz tilshisi.
Óńir basshysy aýdanǵa issapary barysynda birqatar áleýmettik nysandardyń jumysymen de tanysty. Sonyń biri – Muhtar Orazaliev atyndaǵy «Ulan» sport kesheni bolatyn. Jobalyq quny 120 mln teńgeni quraityn keshen elimizdegi barlyq jastaǵy aiaqdopshylar úshin qolaily jaǵdailar jasalǵan. Jalpy alańy 1,5 gektardy quraityn nysanda eki úlken, 2 kishi fýtbol alańshalary jumys isteidi. Munda jas sportshylardyń jyl on eki ai sportpen shuǵyldanýyna barlyq múmkindikter qarastylǵan. 2011 jyly iske qosylǵan keshenniń jaily qonaq úii, sportpen shuǵyldaný jáne jýynatyn bólmeleri de bar.
Oblys ákimi jas sportshylardy baýlýǵa úles qosyp otyrǵan keshenniń jumysyna oń baǵasyn berip, áleýmettik az qamtamasyz etilgen otbasy balalaryna da qolǵabys bildirip turýǵa keńes berdi.
Munan soń oblys ákimi nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan baǵdarlamasy negizinde nesie alǵan jeke kásipker Ýlýgbek Irsalievtiń sharýashylyǵyna atbasyn burdy. Mal sharýashylyǵyn damytýdy maqsat tutqan kásipker taiaýda «Yrys» shaǵyn nesie uiymy arqyly 5 mln teńge nesie alypty. Ol qarjyǵa 34 bas mal satyp alyp, bordaqylapty. Búginde onyń qorasynda 20 bas iri qara mal bar. Nebári 14 sottyq úi irgelik jer telimin tiimdi paidalanyp otyrǵan kásipkerdi jumysyna razy bolǵan ákim oblystyń ózge turǵyndaryna úi irgelik kásiptiń tiimdiligin úirenýge shaqyrdy.
«Qandai keremet. Úiińizdiń aýlasy tar bolasa da, tap-tuinaqtai. Kishkentai ǵana aýlada baý ósirip, mal bordaqylap tabys taýyp otyrsyzdar. Sondyqtan oblystyń ózge turǵyndaryn osyndai usaq sharýashylyqtardy erterek meńgerýge shaqyramyn», - dedi Janseiit Qanseiituly.
Óńir basshysynyń nazarynan «Órleý» jobasy aiasynda 312 myń teńge kóleminde demeý qarjy alǵan kásipker Nurjan Balabekovtiń tigin tsehy da tys qalǵan joq. Bul qarjyǵa ol tigin mashinasy men jip quraldaryn satyp alypty. Munda qazir qyz jasaýyna asa qajetti oiýly kórpe-tósek jabdyqtary ázirlenýde.
