Ońtústik Qazaqstan oblysynda «Jasyl ekonomika» tujyrymdamasyn iske asyrý maqsatynda negizgi jeti mindet anyqtalǵan bolatyn.
Soǵan sáikes óńirde biyl 7,8 myń gektar jerge tamshylatyp sýarý ádisi qoldanylsa, 643 gektarǵa jańbyrlatyp sýarý ádisi engizilgen, dep habarlaidy OQO ákiminiń baspasóz qyzmeti. Sondai-aq, óńirde sýarmaly jerlerdiń kólemin ulǵaitý úshin 2 sý qoimasy iske qosyldy.
Búgin bul týraly oblys ákimdiginiń keńeitilgen májilisinde oblystyq tabiǵi resýrstar jáne tabiǵat paidalanýdy retteý basqarmasynyń basshysy Ilias Quramysov málim etti, dep habarlaidy óńir basshysynyń baspasóz qyzmeti
Basqarma basshysynyń aitýynsha, aldaǵy jyly Ordabasy aýdany men Túrkistan qalasynda jalpy kólemi 57,2 mln tekshe metrdi quraityn jańa eki sý qoimasy salynatyn bolady. Sondai-aq, sý arnalaryndaǵy sý syiymdylyǵyn tómendetý maqsatynda ylǵaldandyrý jáne tuzdanǵan aimaqtarda sor shaiý jumystary uiymdastyrylýda.
«Búginde oblysymyzda jaiylymdardy sýlandyrý boiynsha qudyqtar qazý jumystary jalǵasýda. Máselen, 2015 jyly 202 qudyq qazylsa, onyń 47-si sýbsidiialandy. Al, 2016 jyly 273 qudyq qazylyp, onyń 272-si sýbsidiialanǵan. 2017 jyly 167 qudyq qazylyp, onyń 105-i sýbsidiialanyp otyr. 2018 jylǵy jospar boiynsha oblysymyzda 120 qudyq qazylatyn bolsa, 2019 jyly olardyń sany 200-ge jetkizilmek», - deidi Ilias Quramysov.
Budan bólek, 2018 jyly aýyl sharýashylyǵy daqyldarynyń egis kólemi 802,5 myń gektarǵa ulǵaitylatyn bolady. Sondai-aq, aldaǵy 4 jylda 209 myń 700 turǵyny bar 84 eldi mekendi ortalyqtandyrylǵan aýyz sýmen qamtý josparlanyp otyr.
Sonymen qatar, jańartylatyn energiia kózderiniń 14 jobasy júzege asyrylyp jatyr. Jalpy qýaty 173,3 MVt quraityn 10 jobany 2025 jylǵa deiin júzege asyrý josparlanǵan. «Jasyl ekonomika» tujyrymdamasyna sáikes oblysta búgingi tańda qaita óńdelgen qaldyqtar kólemi 1,4 mln tonnany qurap otyr.
Atqarylǵan jumystarǵa qanyqqan óńir basshysy aldaǵy jyldary iske asyrylatyn jumystardy júielep, «Jasyl ekonomika» tujyrymdamasynyń tolyqtai oryndalýyna kúsh salýdy tapsyrdy.
«Búgingi kúnge oblysymyzda jinaqtalǵan qaldyqtar kólemi 18,3 mln tonnany quraidy. Onyń 14,1 mln tonnasy óndiristik, 4,2 mln tonnasy turmystyq qaldyqtar. Bir sózben aitqanda, qaldyqtardyń ortasynda otyrmyz. Endigi kezekte qaldyqtardy qaita óńdeý arqyly túrli zattar shyǵaryp, kádege jaratýymyz kerek. Sondyqtan qaita óńdeý máselesin qolǵa alý úshin shuǵyl jospar qurýdy tapsyramyn», - dedi Janseiit Qanseiituly.
Májilis barysynda «Qazaqstan Respýblikasynda bilim berýdi jáne ǵylymdy damytýdyń 2016-2019 jyldarǵa arnalǵan memlekettik baǵdarlamasyn» iske asyrý barysy da talqyǵa tústi.
