Shymkentte zamanaýi úlgide jańa áýejai qurylysy bastalmaq, dep habarlaidy oblystyq ákimdiktiń baspasóz qyzmeti.
Atalǵan joba qoldanystaǵy áýejaidyń tiimsiz bolýyna bailanysty qolǵa alynyp otyr. Bul týraly Óńirlik kommýnikatsiialyq qyzmetinde ótken baspasóz máslihatynda oblystyq Sáýlet jáne qala qurylysy basqarmasynyń basshysy Erkin Júsipov málim etti.
Sondai-aq, jýyrda shahardaǵy temir jol vokzalynyń zamanaýi kelbetin anyqtap, jolaýshylardyń tehnikalyq qaýipsizdigin saqtaý maqsatynda jańa eskizdik jobalary ázirlenipti.
«Qazirgi qoldanystaǵy áýejaidyń Qorǵanys ministrliginiń teńgeriminde bolýyna bailanysty jańa áýejaidyń 3 jańa nobaiyn ázirledik. Alǵashqy nusqa boiynsha áýejai qazirgi áýejaidyń ońtústik-batys bóliginde ornalassa, ekinshi nusqada Ordabasy aýdanynyń aýmaǵynda, al úshinshi nusqada Shymkent qalasynyń soltústik jaǵyndaǵy aýmaqta ornalasatyny kórsetilgen», - dedi Erkin Júsipov.
Basqarma basshysynyń aitýynsha, óńirge týristerdi kóptep tartý maqsatynda Taraz, Qyzylorda, Tashkent baǵyttarynan oblys aýmaǵyna kireberis qaqpalar men belgilerdiń jańa nobailary jasalanypty. Sonymen qatar, "Batys Eýropa - Batys Qytai'' halyqaralyq kólik dáliziniń 8 aýdan aýmaǵynan ótetin bóliginde boi kóteretin 39 qyzmet kórsetý nysanynyń eskizdik nobaiy da ázirlenip, oblystyq qala qurylysy keńesiniń talqylaýyna usynylǵan.
Qazirgi tańda oblysymyzdaǵy turǵyndar sany 5 myń adamǵa deiingi eldi mekenderdi damytý men qurylys salý shemalarymen qamtamasyz etý 55 paiyzdy quraidy. 2016 jyly 114 eldi mekenniń shemasyn ázirleý josparlansa, búginde onyń 104 daiyndalǵan.
Budan bólek, basqarma oblys ákiminiń tapsyrmasymen 40 qabatty «Shymkent táji» turǵyn úi kesheniniń nobaiyn ázirlep bitirgen. Sonymen qatar, Shymkent qalasynyń bas josparyna sáikes óndiris jáne bazarlardy, saýda ortalyqtaryn shahar ortalyǵynan qala syrtyna kóshirý nusqalary usynylǵan.
