Ońtústik Qazaqstan oblysynda zaǵiptar arasynda «Ónerim - kóńil shýaǵym» baiqaýy uiymdastyryldy. Oblystyq kózi kórmeitin jáne álsiz kóretin azamattarǵa arnalǵan arnaiy kitaphanasynyń ujymy bastamasymen uiymdastyrylǵan óner saiysyna 14 qala-aýdannan kelgen jarymjan jandar qatysty, dep habarlaidy "Ult aqparat" QazAqparat agenttigine silteme jasap.
Óner saiysy Elbasynyń «Bolashaqqa baǵdar: rýhani jańǵyrý» baǵdarlamalyq maqalasy aiasynda jáne oblystyń 85 jyldyǵyna orailastyryp, sonymen qatar ońtústiktiń týmasy Muhtar Shahanovtyń 75 jyldyǵyna orai uiymdastyrylǵan bolatyn. Zaǵip jandardy qoǵamǵa aralastyrý maqsatynda ótkizilgen sharanyń oblys kóleminde ótken irikteý kezeńi biyl 26 mamyrda bastalǵan. Onda daýys erekshelikterine qarai ánshilerdi, oqý mánerine qarai kórkem sóz sheberleri anyqtalǵan edi. Synan súrinbei ótken 400-ge tarta úmitkerdiń arasynan aqtyq synǵa bul joly 44-i qatysty.
«Poeziia adamnyń janyn jadyratady. Syrshyl aqyndardyń jyry qamkóńil jandarǵa qanat bitiredi. Poeziiadan meniń janym lázzat alady. Ásirese, Muhtar Shahanov, Muqaǵali Mahataevtyń jyrlary shyndyq, adaldyqty tý etedi. Búgin de bir poema jattap keldim»,- deidi festivalge qatysýshy Perizat Úisinbaeva.
Baiqaý shartyna sáikes jeńimpazdarǵa úsh nominatsiia boiynsha baǵa beriledi. Onda jarymjan jandar oblystyń 85 jyldyǵyna orai arnalǵan patriottyq án-jyrlardy shyrqady. «Óleńim - ómirimniń ainasy» kezeńi Muhtar Shahanovtyń týyndylaryna arnalyp, aqynnyń óleńderin oqydy. Al, «Ónerlige - óris keń» nominatsiiasy tabiǵi daýysta dástúrli án shyrqaǵandarǵa berildi. Barlyq jeńmpazdar alǵys hattarmen jáne baǵaly syilyqtarmen marapattaldy.
