Ońtústik Qazaqstan oblysynda «Qazaqstannyń Uly Jibek jolyna saiahat» halyqaralyq festivali aiasynda ótip jatqan eki kúndik «Ontustik Tourism. Invest 2017» týristik forýmynyń alǵashqy kúni qorytyndylandy, dep habarlaidy "Ult aqparat" oblys ákiminiń baspasóz qyzmetine silteme jasap.
Forým aiasynda Ońtústik Qazaqstan oblysyndaǵy týrizm salasy ókilderi men Qytai, Ózbekstan jáne Qazaqstannyń basqa qalalary arasynda 4 memorandýmǵa qol qoiyldy.
Onda eki jaqty áriptestikti nyǵaitý maqsatynda «Ontustik Tourism Center» týristik aqparattyq ortalyǵy qytaidyń «Salem China» kompaniiasymen jáne «Sky Way» týristik kompaniiasymen memorandým jasaldy. Budan ózge, Ońtústik Qazaqstan oblystyq kásipkerlik, indýstrialdy-innovatsiialyq damý jáne týrizm basqarmasy men Hatai provintsiiasy memorandým jasasty, «Ontustik Tourism Center» týristik aqparattyq ortalyǵy men Ózbekstannyń týristik ónimin nasihattaý ortalyǵy arasynda ekijaqty memorandýmǵa qol qoiyldy.
Jalpy alǵanda, bul memorandýmdar taraptarǵa óz aimaqtarynyń týrizm ónimderin birge damytyp, infraqurylymyn salýǵa, investitsiia jumyldyrýǵa múmkindik beredi.
Aita keteiik, mundai deńgeidegi is-shara Shymkentte alǵash ret uiymdastyrylyp otyr. Forým óńirdiń týrizm salasyn damytýǵa jáne tájiribe almasýǵa, ózara tiimdi áriptestikti tereńdetýge jáne sheteldik investorlardy tartýǵa baǵyttalǵan.
Eske salaiyq, forýmǵa Qytai Halyq Respýblikasynyń Memlekettik týrizm basqarmasy jetekshisiniń orynbasary Dý Tszian, Qazaqstan Respýblikasy Mádeniet jáne sport ministrliginiń týrizm indýstriiasy Komitetiniń tóraǵasy M.Murzamadieva, Kazakh Tourizm ulttyq kompaniiasynyń basqarma tóraǵasy R.Kúzembaev, «Atameken» UKP qyzmetkerleri, halyqaralyq jáne qazaqstandyq týroperatorlar, investitsiialyq kompaniialardyń, týristik uiymdarmen BAQ ókilderi, jalpy 500-ge jýyq adam qatysty.
