Búgin Ońtústik Qazaqstan oblysynyń ortalyǵy Shymkentte 1 jeltoqsan - Tuńǵysh Prezident kúni merekesine orai birinshi kezektegi «Astana» turǵyn úi kesheni paidalanýǵa berildi, dep habarlaidy "Ult aqparat".
Osylaisha búgin shymkenttik 96 otbasy baspanaly boldy. Turǵyn úi keshenniń ashylý saltanatyna qatysqan oblys ákimi Janseiit Túimebaev jańa qonys berekeli jáne yrysy mol úlken ordaǵa ainalýyn tiledi.
«Búgin «Nurly jer» turǵyn úi baǵdarlamasy aiasynda «Shymkent» áleýmettik kásipkerlik korporatsiiasy» AQ arqyly qalada salynǵan birinshi kezektegi 2 turǵyn úi paidalanýǵa berilip otyr. Bul úilerdiń qurylysy turǵyn úi kombinattarynyń ónimderin qoldana otyryp, iske asyrylýy jáne memlekettik-jekemenshik áriptestik baǵytyna uqsas júrgizilýde», - dedi ákim.
Ońtústik Qazaqstan oblysynyń turǵyndaryn qoljetimdi turǵyn úimen qamtamasyz etý maqsatynda «Shymkent» ÁKK» UK AQ qurylysqa 1,2 mlrd. teńge kóleminde investitsiia salǵan elimizdegi alǵashqy áleýmettik korporatsiia bolyp otyr.
Qalanyń ákimshilik jáne iskerlik ortalyǵynda ornalasqan turǵyn úi kesheninde toǵyz qabatty 4 turǵyn úi boi kótergen. Mundaǵy páterlerdiń jalpy aýdany - 14776,6 sharshy metrdi quraidy. Búginde 2 blok, iaǵni 96 páter paidalanýǵa berilse, qalǵan 2 blok keler jyldyń birinshi toqsanynyń aiaǵyna deiin paidalanýǵa beriledi. Jobanyń jalpy quny - 2,75 mlrd. teńgeni quraidy.
«Astana» turǵyn úi kesheni ekinshi klasqa jatatyn bir turǵynǵa 25 sh.m. jeke keńistikti esepteý arqyly salynǵan sándi apartamentter. Munda turý jaǵdailary men innovatsiialyq tehnologiialar úshin qajetti barlyq múmkindiktermen qamtamasyz etilgen.
Atalǵan turǵyn úidegi «Óz úiim» baǵdarlamasy boiynsha «Qazaqstannyń turǵyn úi qurylys jinaq banki» AQ-nan páterlerdi satyp alýǵa bolady. Baǵdarlama boiynsha ortasha baǵasy bir sharshy metr úshin 180 myń teńgeni quraidy. Nesieniń jyldyq paiyzdyq mólsherlemesi 5-ten 10 paiyzǵa deiin.
Aita keteiik, turǵyn úi qurylysyn júrgizgen «Ońtústik qurylys servis» JShS-gi qurylys kezinde 300-den astam adamdy jumyspen qamtyǵan.
Jalpy Ońtústik Qazaqstan oblysynda jyl basynan beri 525,4 myń sharshy metr turǵyn úi iaǵni, 5189 páter paidalanýǵa berildi. Al, oblysqa belgilengen jospar 550,6 myń sharshy metr bolsa, jyl qorytyndysymen jospar artyǵymen oryndalady.
