Ońtústik Qazaqstan oblysynda politseiler qoǵamdyq kólik júrgizýshilerin tekserip, tehnikalyq tekserýden ótpegen 36 avtobýsty anyqtady, dep habarlaidy Azattyqqa oblystyq ishki ister departamentiniń baspasóz qyzmeti. 22 qańtarda bastalyp, 18 aqpanǵa deiin jalǵasatyn «Avtobýs» tekserý sharasyna myńǵa jýyq politsei tartylǵan.
IID málimetinshe, politseiler tekserýde qoǵamdyq kólik júrgizýshileriniń 415 ret zań buǵanyn anyqtady. Avtobýs júrgizýshileri negizinen jol erejesin buzyp otyr.
«Ótken úsh kún ishinde qoǵamdyq kólikti óz betinshe zańsyz qaita jabdyqtap alǵan 8 adam jáne qoǵamdyq kóligin tehnikalyq baqylaýdan ótkizbegen 36 júrgizýshi anyqtaldy. 116 júrgizýshi mobildik qurylǵylardy paidalanǵany úshin ákimshilik jaýapkerlishikke tartylsa, jol júrý erejesin buzǵan 52 júrgizýshi, jyldamdyqty asyrǵan 12 júrgizýshi, jaiaý adamdarǵa jol bermegen 16 júrgizýshi ustaldy» delingen habarlamada.
Sonymen birge, kólik júrgizýge ruqsaty joq 13 júrgizýshi jaýapkershilikke tartylyp, 2 qoǵamdyq kólik aiyp turaǵyna jetkizilgen.
Qoǵamdyq kólik júrgizýshilerin tekserý Aqtóbe oblysynda Ózbekstannan eńbek migranttaryn Reseige tasymaldaǵan avtobýs órtenip, 52 Ózbekstan azamaty qaza tapqan soń qolǵa alynyp otyr. 18 qańtar kúni Aqtóbeden 320 kilometr qashyqta Shymkent – Samara jolynda bolǵan qaiǵyly oqiǵada bes adam, onyń ishinde avtobýstyń úsh júrgizýshisi aman qalǵan.
Qazaqstan indýstriia jáne damý ministrligi órtengen 1989 jyly shyqqan KassbohrerSetra markaly avtobýsy Ońtústik Qazaqstan oblysynda tirkelgenin, avtobýstyń tehnikalyq tekserýden ótý merzimi 2016 jyly 17 aqpanda aiaqtalǵanyn habarlaǵan. Iesi jalǵa bergen avtobýs turaqty marshrýt boiynsha jolaýshy tasymaldamaǵan jáne turaqty emes túrde jolaýshy tasymaldaýǵa litsenziiasy bolmaǵan.
