Ońtústik Qazaqstanda «RIC ON KO'RME» atty aptalyq jármeńke bastaý aldy. Alǵash ret uiymdastyrlyp otyrǵan jobaǵa «OŃTÚSTIK» aimaqtyq investitsiialyq ortalyǵy jáne «Yrys» mikroqarjy uiymy muryndyq bolyp otyr, dep habarlaidy oblystyq ákimdiktiń baspasóz qyzmeti.
Otandyq ónimdi qoldaý jáne baǵany turaqtandyrý maqsatynda uiymdastyrylǵan sharanyń saltanatty ashylý rásimine Ońtústik Qazaqstan oblysynyń ákimi Janseiit Túimebaev qatysty. Taýar óndirýshi mekemelerdiń ónimderimen tanysqan óńir basshysy, kásipkerlerdiń jumysyna sáttilik tilep, osy qalyptan taiynbai eńbek etýge shaqyrdy.
«Endi osyndai úlgide úlken kórme uiymdastyrý qajet. «OŃTÚSTIK» AIO jáne «Yrys» mikroqarjy uiymynyń aýdandarda da qarjylandyrǵan jobalary kóp. Sondyqtan ár aýdanda osyndai jármeńke uiymdastyrý kerek. Bolashaqta mundai jármeńke turaqty ótkizilip tursa, áleýmettik bazarlar qalyptasady. Osylaisha biz baǵalardy arzandatý jáne turaqtandyrýǵa qol jetkizemiz», - dedi J. Túimebaev.
Óz kezeginde jármeńkeni uiymdastyrǵan «OŃTÚSTIK» aimaqtyq investitsiialyq ortalyǵynyń Basqarma tóraǵasy Qýanysh Baitóre kompaniia halyqqa qoldaý kórsetýge ár qashan da daiyn ekendigin jetkizdi. Sondai-aq, atalǵan jármeńke ár senbi saiyn dástúrli túrde jalǵasatynyn aitty. «Biz tek qana qarjy institýty emespiz, bizdiń kompaniia damý institýty bolyp esepteledi. Sondyqtan, biz kásipkerlerge tek qarjy berip qana qoimai, olardyń kásibin ári qarai ilgeriletýge jáne damytýǵa barynsha qoldaý kórsetemiz. Olar bizben, biz olarmen birge ósemiz», - dedi Q. Baitóre.
Jármeńkege «Maksimým» JShS aimaqtyq investitsiialyq ortalyǵynan jeńildetilgen nesie alyp, kásibin júrgizgen 40-qa jýyq kásipker qatysyp, halyqqa otandyq ónimderin tómen baǵada usyndy. Olardyń qatarynda balyq jáne shujyq, jemis-jidek, kókónister, et jáne sút ónimderi bar. Odan bólek, jeńil ónerkásiptik taýarlar, qoldan jasalǵan buiymdar, qurylys materialdary, sondai-aq balalar úshin oiynshyqtardy da tabýǵa bolady.
Jármeńkeniń saltanatty ashylý rásiminde balalar úshin oiyn-saýyqtar, jáne ulttyq oiyndar uiymdastyrylyp, halyqqa palaý taratyldy. Bir buryshta jármeńkege qoiylǵan etterden barbekiý pisirilip, halyqtyń bergen baǵasy arqyly eń dámdi et anyqtaldy.
Aita ketý kerek, atalmysh shara Elbasymyzdyń halyqqa joldaýy, rýhani jańǵyrý aiasynda qolǵa alynyp, basqa da uiymdarǵa áleýmettik sharalardy ótkizýdi nasihattaýdy kózdeidi. Sondai-aq, kompaniianyń «RIC ON KO'RME» ataýy arqyly latyn álipbiine kóshýdi qoldaitynyn kórsetti.
