Ońtústik Qazaqstan oblysynda «Memlekettik til - halyqtar dostyǵynyń dánekeri» atty baiqaý ótti. Oblystyq tilderdi damytý, arhivter men qujattama basqarmasy uiymdastyrǵan sharaǵa ózge ult ókilderiniń 11 synyp oqýshylary qatysty, dep habarlaidy QazAqparat tilshisi.
Memlekettik tildiń qoldanylý aiasyn kóbeitý men mártebesin arttyrý, ony ózge ult ókilderiniń jan-jaqty igerýine yqpal etý maqsatynda uiymdastyrylǵan sharada jastardyń qazaq tilin erkin meńgergendigine mán berildi. Baiqaýǵa qatysqan orys, ózbek, tájik tilderinde bilim alatyn bitirýshi túlekter qazaq tilinde shaǵyn shyǵarma jazdy. Sonymen qatar qatysýshylar memlekettik tilde óleń túrinde nemese kórkemsóz oqý arqyly ózin jáne ózi oqityn mektebin jurtshylyqqa tanystyrdy. Qazaq tili men ádebietine qatysty suraqtarǵa jaýap berdi. Qazaq halqynyń ulttyq ónerinen, atap aitqanda ańyz, qissa, dastan, kórkemsóz, kúi, terme jáne t.b. úzindiler kórsetip, saiysqa tústi.
Al, qazylar alqasy úmitkerlerdiń bilimi men ónerin baǵalaý kezinde olardyń memlekettik tildi meńgerýine, jazý saýattylyǵy men sóileý mánerine, qazaq tili men ádebietin bilý deńgeiine, sahnada ózin-ózi ustaýy men sheshendik qabiletine jáne kiim sánine nazar aýdardy.
Baiqaý nátijesinde bas júldeni Tólebi aýdanynan qatysqan Diana Isataeva alsa, birinshi oryn Kentaý qalasynan qatysqan Gúlsina Nematovaǵa buiyrdy. Al, ekinshi oryndy Arys qalasynan kelgen Viktoriia Cherkashina, úshinshi oryndy Otyrar aýdanynan qatysqan Vladislav Klimenko jeńp aldy. Qalǵan qatysýshylar yntalandyrý syilyqtarymen marapattaldy. Baiqaýdyń qatysýshylaryna Ońtústik Qazaqstan oblysy tilderdi damytý, arhivter men qujattama basqarmasynyń arnaiy alǵys hattary men diplomdary tapsyryldy.
