Ońtústik Qazaqstan oblystyq opera jáne balet teatrynda «Altyn kúz» romans keshi ótti. Onda úzdik klassikalyq romanstar men qazaq án óneriniń injý-marjandary oryndaldy, dep habarlaidy QazAqparat tilshisi.
Poeziiamen ásem saz úilesimdi úndestik tapqan týyndylar pianinonyń súiemeldeýimen oryndaldy. Keshte kórermenge esimi etene tanys teatr ártisteri Qairat Qulynshaqov, Aleksei Skibin bastaǵan jiyrma ánshi óner kórsetti. Eshqashan eskirmeitin janr ár alýandyǵymen tyńdarmanyn tańdandyrdy.
Jalpy, romans - kez-kelgen qaǵyp alyp áýelete ketetin ońai janr emes. Sondyqtan, mádeniet maitalmandary bul keshke tyńǵylyqty daiyndalǵandaryn aitady.
«Negizinde romans miniatiýra túrine jatady. Ol óte qiyn. Óitkeni bir kishkentai shyǵarmanyń ishinde sóz arqyly, mýzyka arqyly mazmunyn jetkizý kerekpiz. Sondyqtan bul janrdy daiyndaý óte qiyn. Oǵan ýaqytta kóp keted», - deidi oblystyq opera jáne balet teatrynyń kontsertmeisteri Aigúl Aiǵazieva.
Aita keteiik, Eýropada erteden tamyr jaiǵan bul óner, qazaq topyraǵyna HH ǵasyrdyń 30-shy jyldary jetti. Bai mýzykalyq muramyz ár jyldary Abai óleńderine jazylǵan romanstarmen tolyqty. Jasyratyny joq, qazaqy qoǵamda bul ónerdiń tyńdarmandar qatary qalyń emes. Áitsede, osyndai óner keshterinen qalys qalmai, qulaqtan kirip boidy alar týyndylardy jany qalaityn jandar da az emes.
«Ózim operany óte jaqsy kórgennen keiin osyndai keremet án keshterine jii kelip turamyn. Kelip otyrǵan kezińde bir aidyn kóldiń janynda, kók maisada, samal jel soǵyp turǵandai áser alasyń. Janyń tynyshtalady. Qazir aitady ǵoi stress, nervnaia sistema, anaý-mynaý deidi. Osyndai keshterge kóbirek keletin bolsa, stressti de umytamyz, janymyzda lázzat alady», - deidi qala turǵyny Zeinash Qaldybekqyzy.
