Ońtústik Qazaqstan oblysynda «Memlekettik tildiń latyn grafikasyndaǵy álipbiiniń biryńǵai standarttaryn engizý máseleleri» jóninde alqaly jiyn ótti, dep habarlaidy "Ult aqparat".
Jiynǵa oblys ákimi, oblystyq basqarma basshylary, ziialy qaýym ókilderi, túrkolog-ǵalymdar, joǵary oqý oryndarynyń ǵalymdary, til mamandary, magistrler men stýdentter jáne BAQ ókilderi qatysty.
Basqosýda sóz alǵan Ońtústik Qazaqstan oblysynyń ákimi Janseiit Túimebaev latyn álipbiiniń mańyzdylyǵyna erekshe toqtalyp, Elbasynyń «Bolashaqqa baǵdar: rýhani jańǵyrý» atty maqalasynda aldaǵy jyldarda myqtap qolǵa alý qajet bolatyn birneshe jobany usynǵanyn atap ótti.
Otyrysqa qatysýshylar jańa álipbidiń jobasyn talqylap, túrkolog ǵalymdar latyn álipbiiniń biryńǵai nusqasyna qatysty óz pikirlerin bildirdi.
Máselen, filologiia ǵylymdarynyń doktory, professor Mekemtas Myrzahmetuly «Latyn álipbiine kóshý – sanany otarsyzdandyrý jolyndaǵy mańyzdy qadam» taqyrybyna keńinen toqtalsa, professor, M.Áýezov atyndaǵy Ońtústik Qazaqstan Memlekettik ýniversiteti filologiia fakýltetiniń dekany Bolatbek Tileýberdiev «Bolashaqqa baǵdar: rýhani jańǵyrý» maqalasymen oblystaǵy onomastikalyq ataýlardyń sabaqtastyǵy» jóninde baiandama jasady.
Sonymen qosa, Ońtústik Qazaqstan pedagogikalyq institýty filologiia jáne tarih fakýltetiniń dekany Nariman Nurpeiisov «Rýhani jańǵyrý jolyndaǵy tarih taǵylymy» jóninde tereńnen oi qozǵasa, «Latyn álipbiine kóshý qajettiligi» taqyrybynda tarih ǵylymdarynyń kandidaty, M.Áýezov atyndaǵy Ońtústik Qazaqstan oblysy memlekettik ýniversitetiniń kafedra meńgerýshisi, dotsent Sársebai Káribaev baiandama jasady.
Mańyzdy máseleler talqylanyp, jaqsy pikirler aitylǵan basqosýdy qortyndylaǵan Ońtústik Qazaqstan oblysynyń ákimi Janseiit Túimebaev latyn álipbiine kóshý kezinde qazaq tiliniń úndestik zańdylyqtaryn saqtaýǵa mán berýdi usyndy.
«Elimizdiń endigi bolashaǵy – saiasi-ekonomikalyq faktormen qatar, onyń memlekettik tili – qazaq tiliniń taǵdyryna da tikelei bailanysty. Sondyqtan latyn álippesine kóshýde qazaq tiliniń singormanizm jáne assimiliatsiialyq zańdylyǵyn saqtaýymyz kerek. Eger olar saqtalmaǵan jaǵdaida til buzylady. Eger muny saqtaǵan jaǵdaida, tilimizdiń úndestigi onyń ádemiligi, durys aitýy da buzylmaityn bolady», - dedi Janseiit Qanseiituly.
Óńirdiń túrkolog-ǵalymdary men ziialy qaýym ókilderi bas qosqan jiynda latyn álipbiine kóshý men jańa álipbige beiimdelý máselesindegi usynys-pikirler jinaqtalyp, sarapqa salynatyndyǵy aityldy.
