Búgin Ońtústik Qazaqstan oblysynda «Qurylysshylar kúni» kásibi merekesi atalyp ótti. Tamyz aiynyń ekinshi jeksenbisinde toilanatyn osynaý meiramda atalǵan kásip ielerin quttyqtaǵan oblys ákimi Janseiit Túimebaev bul salany damytý búginde memlekettiń ózekti ekonomikalyq jáne saiasi mindeti bolyp tabylatynyn jetkizdi.
«Qurylys indýstriiasynyń órkendeýi, áleýmettik mańyzdy nysandardyń salynýy álemdegi otyzdyqqa umtylǵan elimizde erekshe oryn alady. Sońǵy jyldary qurylys nysandaryn salýǵa arnalǵan investitsiialar kólemi respýblikalyq, oblystyq jáne aýdandyq biýdjetterden, sonymen birge jeke kompaniialar men firmalardyń qarjylary esebinen edáýir ósýde. Atap aitqanda bilim berý, densaýlyq saqtaý, mádeniet, sport, turǵyn-úi jáne injenerlik infraqurylymdy damytý siiaqty áleýmettik mańyzdy salalarǵa memleket tarapynan orasan zor kóńil bólinip, «Nurly jol», «Nurly jer» baǵdarlamary sheńberinde qarqyn alyp otyr», - dedi óńir basshysy.
Saladaǵy osynaý aqparattarmen bólisken aimaq basshysy munan soń, qurylys salasynda kóptegen jyldar eńbek etip, óńirdegi birqatar qurylys nysandarynyń boi kóterýine atsalysqan qurmetti qurylysshylardy marapattady.
Atap aitqanda, salaǵa eńbegi sińgen úsh azamat QR Indýstriia jáne damý ministrliginiń Qurylys jáne turǵyn úi kommýnaldyq sharýashylyq isteri komitetiniń «Qurmetti qurylysshy» tósbelgisine ie bolsa, bir adam «Qurmetti jolshy» tósbelgisin, bes azamat atalǵan ministrliktiń Alǵys hatyn aldy. On úsh sala mamanyna óńir basshysynyń Gramotasy berilse, bes azamat ákimniń Alǵys hatymen nagradtaldy. Jalpy, bul kúni 40-qa jýyq qurylys salasyna qatysty azamattar marapattalyp, el adyndaǵy mereii ústem boldy.
Jalpy, 2017 jyly oblys aýmaǵynda 209 áleýmettik nysan qurylysy boiynsha investitsiialyq jobalardyń iske asyrylýyna 64,9 mlrd.teńge qaraldy. Sondai-aq jyl sońyna deiin 116 nysandy paidalanýǵa tapsyrý josparlanyp otyr. Ulttyq qordan – «Nurly jol» Memlekettik baǵdarlamasy aiasynda 32 mektep qurylysyn júrgizýge 17,4 mlrd.teńge bólinse, 2016 jyldan ótpeli 19 mektepti biyl paidalanýǵa berý josparlanyp, búgingi kúnge 5 mektep tapsyryldy.
Turǵyn úi qurylysy damýynyń negizgi faktory – qurylysqa investitsiialyq qarjylardyń kóptep baǵyttalýy bolyp tabylady. Baspanamen qamtamasyz etý – halyqtyń turmys deńgeii damýynyń negizgi kórsetkishi. 2017 jyly barlyq qarjylandyrý kózderi arqyly 226 turǵyn úidiń qurylysy júrgizilýde. Bul degenińiz 10 879 páter. Jyl sońyna deiin 115 úidi (6375 páter) paidalanýǵa tapsyrý josparlanyp otyr.
«Nurly jer» turǵyn úi qurylysy baǵdarlamasynyń barlyq baǵyttary boiynsha 2017 jyldyń jeti aiynda OQO aýmaǵynda 348,0 myń sh.m. (3154 páter) turǵyn úi paidalanýǵa tapsyrylyp, ótken jyldyń osy merzimimen salystyrǵanda 115,%-ǵa oryndaldy. 2017 jyldyń jospary – 550,6 myń sh.m. turǵyn úidi aiaqtaý josparlansa, jyl qorytyndysymen 700 myń sh.m. paidalanýǵa tapsyrylady dep kútilýde.
Jol qurylysy salasyn damytýǵa 2017 jyly biýdjetten 29 mlrd 445,7 mln. teńge qaralyp, 584 nysan nemese 1 570 shaqyrym joldar men kósheler qurylys-jóndeý jumystarymen qamtylatyn bolady. Oblystyq jáne aýdandyq mańyzy bar 801,8 shaqyrym jolda qurylys-jóndeý jumystary júrgizilip, jyl sońyna deiin 115,4 shaqyrym jol qurylyys aiaqtalady.
