Búgin Shymkentte «Quqyq qorǵaý qyzmetteri» ortalyǵy ashyldy. Onyń ashylý saltanatyna Bas prokýrordyń orynbasary Marat Ahmetjanov pen oblys ákimi Janseiit Túimebaev, oblys prokýrory Nurǵalym Ábdirov jáne ózge de quqyq qorǵaý organdarynyń basshylary qatysty, dep habarlaidy "Ult aqparat".
Ortalyqta 11 mekemeniń mamandary azamattarǵa aqysyz túrde 22 kásibi quqyqtyq kómek kórsetedi. Turǵyndar tájiribeli prokýrorlar men advokattardyń, mediatorlar men notariýstardyń, sondai-aq memlekettik kirister organdary men ákimdik, probatsiia qyzmetkerleriniń kómegine júgine alady. Azamattarǵa ashyq jáne jariialy túrde kómek kórsetetin ári olardy áýre-sarsańǵa salmai, quqyǵyn jedel túrde qorǵaý maqsatynda ashylǵan ortalyq halyqtyń memlekettik jáne quqyqtyq organdarǵa degen senimin arttyrady.
Saltanatty jiynda QR Bas prokýrorynyń orynbasary Marat Ahmetjanovtyń aitýynsha, mundai ortalyqtar azamattardyń aryz-shaǵymdarynyń azaiýyna, máselesin der kezinde sheshýlerine ońtaily septigin tigizedi.
«Buǵan deiin azamattar aryzdanyp barǵanda basshy qabyldaidy da, bir aidan keiin «sizdiń jaýabyńyz qanaǵattandyrylýsyz qaldy» dep jaýap beretin. Ne kedergi ekenin aitpaidy, sheshý joldaryn túsindirmeidi. Odan keiin túsinbeýshilik týyndaidy da, ol azamat taǵy birneshe jerge aryzdanady. Qazir biz Elbasynyń tapsyrmasyna sáikes, árbir adamǵa qarapaiym tilmen jaýap berýge tyrysyp jatyrmyz. Endi prokýrorlar halyqqa meilinshe jaqyn bolyp, problemasyn túsinip, sheshýge atsalysýda. Endi osyndai ortalyqtar arqyly halyq prokýratýranyń ashyq ári qoljetimdi ekenin, muqiiat tyńdap, sheshýge kómektesip jatqanyn kórdi. Qaitalanyp jazylatyn aryzdardyń sany úsh esege azaidy. Iaǵni, azamattar osy ashylǵan ortalyqqa kelý arqyly óz sheshimine jaýabyn tabý kerek», - dedi Marat Ahmetjanov.
«Nur Otan» partiiasy oblystyq filialynyń ǵimaratynan ashylǵan ortalyq zaman talabyna sai injenerlik-tehnikalyq qońdyrǵylarmen, elektrondy kezek júiesimen, «ConnectionPoint» ózine-ózi qyzmet kórsetý sektorymen, kútý zalymen jáne t.b. qajetti infraqurylymdarmen jabdyqtalǵan. «Bir tereze» qaǵidatyna negizdelgen ortalyqta kez kelgen kelýshiler ózin tolǵandyrǵan másele boiynsha operatorlardan keńes alyp, suraqtyń mazmunyna qarai tiisti mamandarǵa joldanady. Prokýrorlardyń aitýynsha, munda barlyq aryzdar mindetti túrde qabyldanady. Ári olardy túpkilikti sheshýge quqyq qorǵaý, quzyrly organdar kúsh salmaq. Bul óz kezeginde sybailas jemqorlyq áreketterge tosqaýyl bolmaq.
Budan bólek prokýrorlar qadaǵalaýshy organǵa aryzdanýdyń tiimdi joly retinde jańadan jasalǵan mobildi qosymshalardy tanystyrdy. Bul boiynsha kez kelgen azamat uialy telefon arqyly prokýrorǵa kirýge kezekke turyp, elektrondy túrde aryzdaryn joldai alady.
