بٷگٸن شىمكەنتتە «قۇقىق قورعاۋ قىزمەتتەرٸ» ورتالىعى اشىلدى. ونىڭ اشىلۋ سالتاناتىنا باس پروكۋروردىڭ ورىنباسارى مارات احمەتجانوۆ پەن وبلىس ەكٸمٸ جانسەيٸت تٷيمەباەۆ, وبلىس پروكۋرورى نۇرعالىم ەبدٸروۆ جەنە ٶزگە دە قۇقىق قورعاۋ ورگاندارىنىڭ باسشىلارى قاتىستى, دەپ حابارلايدى "ۇلت اقپارات".
ورتالىقتا 11 مەكەمەنٸڭ ماماندارى ازاماتتارعا اقىسىز تٷردە 22 كەسٸبي قۇقىقتىق كٶمەك كٶرسەتەدٸ. تۇرعىندار تەجٸريبەلٸ پروكۋرورلار مەن ادۆوكاتتاردىڭ, مەدياتورلار مەن نوتاريۋستاردىڭ, سونداي-اق مەملەكەتتٸك كٸرٸستەر ورگاندارى مەن ەكٸمدٸك, پروباتسييا قىزمەتكەرلەرٸنٸڭ كٶمەگٸنە جٷگٸنە الادى. ازاماتتارعا اشىق جەنە جارييالى تٷردە كٶمەك كٶرسەتەتٸن ەرٸ ولاردى ەۋرە-سارساڭعا سالماي, قۇقىعىن جەدەل تٷردە قورعاۋ ماقساتىندا اشىلعان ورتالىق حالىقتىڭ مەملەكەتتٸك جەنە قۇقىقتىق ورگاندارعا دەگەن سەنٸمٸن ارتتىرادى.
سالتاناتتى جيىندا قر باس پروكۋرورىنىڭ ورىنباسارى مارات احمەتجانوۆتىڭ ايتۋىنشا, مۇنداي ورتالىقتار ازاماتتاردىڭ ارىز-شاعىمدارىنىڭ ازايۋىنا, مەسەلەسٸن دەر كەزٸندە شەشۋلەرٸنە وڭتايلى سەپتٸگٸن تيگٸزەدٸ.
«بۇعان دەيٸن ازاماتتار ارىزدانىپ بارعاندا باسشى قابىلدايدى دا, بٸر ايدان كەيٸن «سٸزدٸڭ جاۋابىڭىز قاناعاتتاندىرىلۋسىز قالدى» دەپ جاۋاپ بەرەتٸن. نە كەدەرگٸ ەكەنٸن ايتپايدى, شەشۋ جولدارىن تٷسٸندٸرمەيدٸ. ودان كەيٸن تٷسٸنبەۋشٸلٸك تۋىندايدى دا, ول ازامات تاعى بٸرنەشە جەرگە ارىزدانادى. قازٸر بٸز ەلباسىنىڭ تاپسىرماسىنا سەيكەس, ەربٸر ادامعا قاراپايىم تٸلمەن جاۋاپ بەرۋگە تىرىسىپ جاتىرمىز. ەندٸ پروكۋرورلار حالىققا مەيلٸنشە جاقىن بولىپ, پروبلەماسىن تٷسٸنٸپ, شەشۋگە اتسالىسۋدا. ەندٸ وسىنداي ورتالىقتار ارقىلى حالىق پروكۋراتۋرانىڭ اشىق ەرٸ قولجەتٸمدٸ ەكەنٸن, مۇقييات تىڭداپ, شەشۋگە كٶمەكتەسٸپ جاتقانىن كٶردٸ. قايتالانىپ جازىلاتىن ارىزداردىڭ سانى ٷش ەسەگە ازايدى. ياعني, ازاماتتار وسى اشىلعان ورتالىققا كەلۋ ارقىلى ٶز شەشٸمٸنە جاۋابىن تابۋ كەرەك», - دەدٸ مارات احمەتجانوۆ.
«نۇر وتان» پارتيياسى وبلىستىق فيليالىنىڭ عيماراتىنان اشىلعان ورتالىق زامان تالابىنا ساي ينجەنەرلٸك-تەحنيكالىق قوڭدىرعىلارمەن, ەلەكتروندى كەزەك جٷيەسٸمەن, «ConnectionPoint» ٶزٸنە-ٶزٸ قىزمەت كٶرسەتۋ سەكتورىمەن, كٷتۋ زالىمەن جەنە ت.ب. قاجەتتٸ ينفراقۇرىلىمدارمەن جابدىقتالعان. «بٸر تەرەزە» قاعيداتىنا نەگٸزدەلگەن ورتالىقتا كەز كەلگەن كەلۋشٸلەر ٶزٸن تولعاندىرعان مەسەلە بويىنشا وپەراتورلاردان كەڭەس الىپ, سۇراقتىڭ مازمۇنىنا قاراي تيٸستٸ ماماندارعا جولدانادى. پروكۋرورلاردىڭ ايتۋىنشا, مۇندا بارلىق ارىزدار مٸندەتتٸ تٷردە قابىلدانادى. ەرٸ ولاردى تٷپكٸلٸكتٸ شەشۋگە قۇقىق قورعاۋ, قۇزىرلى ورگاندار كٷش سالماق. بۇل ٶز كەزەگٸندە سىبايلاس جەمقورلىق ەرەكەتتەرگە توسقاۋىل بولماق.
بۇدان بٶلەك پروكۋرورلار قاداعالاۋشى ورگانعا ارىزدانۋدىڭ تيٸمدٸ جولى رەتٸندە جاڭادان جاسالعان موبيلدٸ قوسىمشالاردى تانىستىردى. بۇل بويىنشا كەز كەلگەن ازامات ۇيالى تەلەفون ارقىلى پروكۋرورعا كٸرۋگە كەزەككە تۇرىپ, ەلەكتروندى تٷردە ارىزدارىن جولداي الادى.
