Ońtústik Qazaqstan oblysynda 1 jeltoqsan - Qazaqstan Respýblikasy Tuńǵysh Prezidenti kúni merekesine orai «dóńgelek ústel» májilisi ótti. Qazaqstan halqy Assambleiasy oblystyq filialy janyndaǵy ǵylymi-sarapshylyq toptyń uiymdastyrýymen ótken basqosý «Qazaqstan halqy Assambleiasy - Elbasy qurǵan biregei institýt» taqyrybynda órbidi , dep habarlaidy "Ult aqparat".
Shymkent qalasyndaǵy «Qazaqstan halqy Assambleiasy» ǵimaratynda ótken jiynǵa oblystyq assambleia janyndaǵy ǵylymi-sarapshylyq top músheleri, ǵalymdar, oblystyq etnomádeni birlestikter men assambleia janyndaǵy qurylymdardyń jetekshileri, dini konfessiialardyń ókilderi, «Nur Otan» partiiasynyń qyzmetkerleri, buqaralyq aqparat quraldarynyń ókilderi qatysty. Májilisti oblystyq Qazaqstan halqy Assambleiasy tóraǵasynyń orynbasary, oblys ákimi apparaty assambleia hatshylyǵynyń meńgerýshisi Muratáli Qalmuratov sóz sóilep ashty.
«Tuńǵysh Prezident kúni» merekesiniń bekitilýi - halyqtyń óz kóshbasshysyna degen qurmeti. Bul osydan 26 jyl buryn Nursultan Nazarbaevty Prezident etip sailaǵan halyqtyń sátti jasalǵan tańdaýyna degen qurmet. Táýelsizdiktiń birinshi kúninen bastap Memleket basshysy elimizdegi alýan túrli mádenietter men etnostar arasynda tózimdilik qarym-qatynasty qalyptastyrýdyń maqsaty men dáiekti saiasatyn ustanýdy usyndy», - dedi Muratáli Qalmuratov.
Ol sondai-aq jalpyulttyq birlik salasyndaǵy memlekettik saiasattyń mańyzdylyǵyna, Elbasynyń tarihi sheshimderine keńinen toqtaldy. Májilis aiasynda Elbasy týraly kitap kórmesi uiymdastyrylyp, arnaiy ázirlengen beinefilm kórsetildi.
Sondai-aq, oblystyq QHA Qoǵamdyq kelisim keńesiniń tóraǵasy Orynbai Rahmanberdiev pen birqatar ǵalymdar jáne oblystyq korei etnomádeni birlestiginiń tóraiymy Roza Pak baiandama jasady. Memleket basshysynyń jalpyulttyq birlik salasyndaǵy saliqaly saiasatyn, álemdik arenadaǵy biik bedelin, el ekonomikasyn arttyrý jolyndaǵy jasampaz eńbekterin sóz etti. Aita keteiik, Elbasy N.Nazarbaevtyń bastamasymen 1995 jyly qurylǵan Qazaqstan halqy Assambleiasy osy jyldar ishinde qazaqstandyqtardyń júreginen oryn alyp, ómirsheńdigin kórsetti. Búginde Parlamentte etnos ókilderinen sailanǵan depýtattardyń zań shyǵarýshylyq úderiske qatysýy resmi turǵyda bekitilgen álemdegi jalǵyz memleket ekendigi májiliste airyqsha aityldy.
