Ońtústik Qazaqstan oblystyq Qazaqstan halqy Assambleiasy janyndaǵy Qoǵamdyq kelisim keńesiniń músheleri 300 myńnan astam turǵyny bar ári halqy tyǵyz qonystanǵan Maqtaral aýdanyna kelip, Myrzashól, Dostyq, Órkendi eldi mekenderinde aýyl azamattaryn arnaiy qabyldady, dep habarlaidy "Ult aqparat" aimaq basshysynyń baspasóz qyzmetine silteme jasap.
Kóshpeli qabyldaýǵa jinalǵan jergilikti turǵyndar aýyl-aimaqtaǵy birqatar ózekti máselelerdi keńes músheleriniń nazaryna jetkizdi. Eldi mekenderge feldsherlik-akýsherlik pýnkt pen mektep salý jáne aýyldarǵa tabiǵi gaz tartý, Myrzashóldegi mádeniet úiin kúrdeli jóndeý, aýyl sharýashylyǵyn qoldaý syndy jaittar qabyldaýda ashyq aityldy. Óz kezeginde oblystyq qoǵamdyq kelisim keńesiniń músheleri men aýdan ákimdiginiń jaýapty qyzmetkerleri aýyl halqynyń talap-tilekterin tyńǵylyqty tyńdap, qoiylǵan saýaldarǵa jaýap berdi. Birqatar túitkildi máselelerdi túrtip aldy.
Kóshpeli qabyldaýda OQO QHA tóraǵasynyń orynbasary Muratáli Qalmuratov assambleia janynan qurylǵan Qoǵamdyq kelisim keńesteriniń negizgi maqsattarynyń biri – jergilikti jerlerdegi áleýmettik máselelerdiń sheshilýine yqpal etip, qoǵamdy tolǵandyrǵan ózekti problemalardy jergilikti bilikpen birlese retteý ekenin jetkizdi. Osyndai kóshpeli qabyldaýlardyń jyl sońyna deiin óńirdegi 3 aýdannyń aýyl-aimaqtarynda jalǵasatynyn habarlady. Qabyldaýǵa kelip, aýyldaǵy ózekti máselelerdi jasyrmai jetkizgen aýyl turǵyndaryna alǵysyn bildirdi. Sondai-aq, kóterilgen jaittar oblys basshylyǵynyń nazaryna usynylatynyn airyqsha aitty.
Esterińizge salaiyq, búginde 3 millionǵa jýyq turǵyny bar ońtústikte túrli deńgeide 203 Qoǵamdyq kelisim keńesi áreket etedi. Biylǵy I jartyjyldyqta 218 máseleni qarastyryp, memlekettik qurylymdarǵa 149 usynym bergen oblystyq assambleia janyndaǵy keńesteriniń otyrystarynda memleket tarapynan beriletin sýbsidiialar, jer telimderin usynýda ashyqtyq pen jariialylyq úrdisin engizý, aǵynsý tapshylyǵy, jaiylym jerlerdiń jetispeýshiligi, jasóspirimder arasyndaǵy qylmystyń aldyn alý jaiy qaraldy. Aýyl ákimderi men memlekettik mekemelerdiń jáne ýchaskelik politsiia inspektorlarynyń esepterin tyńdaý tájiribege engizilgen.
