Búgin Ońtústik Qazaqstan oblysyna jumys saparymen kelgen QR Premer-Ministriniń birinshi orynbasary Asqar Mamin jumysshy toppen birge Shymkent qalasyndaǵy halyqaralyq áýejaidy qaita qurý boiynsha jiynǵa qatysty. Májiliske jumysshy toptan bólek, oblys ákimi Janseiit Túimebaev qatysyp, Shymkent áýejaiy eldegi eń qarqyndy damyp kele jatqan áýejailardyń biri ekenin aitty, dep habarlaidy "Ult aqparat".
Aimaq basshysy osy jyldyń 9 aiynda mundaǵy jolaýshylar aǵymy 600 myńnan astam adamdy qurap, ótken jyldyń tiisti kezeńimen salystyrǵanda 30 paiyzǵa artqanyn atap ótti. Jiynda jolaýshylar habynyń halyqaralyq jolaýshylar men oblys turǵydaryna álemdik deńgeide qyzmet kórsetetin birqatar jobalar otyrysqa qatysýshylardyń nazaryna usynyldy. Onda oblys ákiminiń birinshi orynbasary Darhan Satybaldy 2020 jylǵy TMD elderiniń mádeni astanasy retinde Shymkent qalasynyń jariialanýyna bailanysty aýmaqtardyń damý baǵdarlamasyna sáikes Shymkent álemdik deńgeidegi qala retinde damýy josparlanǵanyn aitty.
«2020 jylǵy TMD elderiniń mádeni astanasy retinde Shymkent qalasynyń jariialanýyna bailanysty - halyqaralyq deńgeidegi túrli mádeni sharalardy ótkizýge erte bastan daiyndalý qajettiligi týyndaýda. Ońtústik Qazaqstan oblysy kórshi Ózbekstan Respýblikasymen shekaralas bolǵandyqtan, kórshi eldiń shekaralas aimaqtarymen áleýmettik-mádeni jáne ekonomikalyq qarym-qatynas jaqsaryp keledi. Joǵaryda aitylǵan barlyq alǵysharttardan oblys ortalyǵyna jaqyn jáne alys shetelderden kelýshilerdiń sany eselep ósetini belgili. Osyǵan bailanysty, oblystyń týristtik, halyqaralyq bailanystar áleýetin damytý maqsatynda áýe jáne temirjol kóligi infraqurylymyn qarqynyn arttyrý qajet. Bul óz kezeginde oblys ekonomikasyna oń áser etip, biýdjet kiristeriniń ulǵaiýy men jańa jumys oryndary ashylýna septigin tigizedi», - dedi oblys ákiminiń birinshi orynbasary.
Sondai-aq, ol jolaýshylar haby qurylysynyń jobasy búgingi zaman talabynan týyndaǵan joba retinde baǵalai otyryp, ákimdik tarapynan áýejaidyń aýmaǵyn keńeitý, infraqurylym qurylysy men avtomobil joldary júiesin jolaýshylar aǵynyna sai damytý boiynsha birqatar usynystardy jetkizdi. Budan bólek, aimaq basshysy týristik áleýeti mol óńirde ekinshi temir jol vokzalyn salý jaiy men Tashkent-Túrkistan baǵytynda temir jol qatynasyn damytýdy usyndy.
Májiliste sonymen birge, «Qazaqstan temir Joly» UK» AQ Prezidenti Qanat Alpysbaev «Óńirlerdi damytý 2020» baǵdarlamasynda basymdyqty million turǵyny bar Almaty men Shymkent qalalaryn damytý haby retinde qarastyrylǵanyn málimdedi. Osy qalalardyń damýy Almaty men Shymkent aglomeratsiiasyn damytýdyń uzaq merzimdi josparlary aiasynda júzege asyrylatynyn da atap ótti.
«Baǵdarlamada sonymen birge Shymkenttegi áýejai habynyń qurylysy qarastyrylǵan. Qazirgi ýaqytta Shymkent áýejaiy elimizdiń qarqyndy damyp kele jatqan áýe ailaqtarynyń biri bolyp tabylady. 2014 jyl men 2016 jyldy salystyrǵanda jolaýshylar tasymalynyń ósýi 40% -dan asady. Lufthansa Consulting Gmbh kompaniiasy ázirlegen áýejaidyń damý strategiiasyna sáikes 2030 jylǵa qarai trafik kólemi jylyna 3 mln adamǵa jetedi. Sheteldik aviakompaniialar osy oblystan Úrimshi, Kiev, Deli, Dýbai Tegeran, Pekin, Praga baǵyttary boiynsha reister ashýǵa qyzyǵýshylyq tanytýda. Ońtústik Qazaqstan oblysy - tarihi turǵydan mańyzdy aimaq, ol sheteldik týristerdiń qyzyǵýshylyǵyn týdyrady. Aimaqtyń týristik klasterin damytý aimaqtyń tiimdi ekonomikalyq damýyna yqpal etedi jáne áýejaidyń óndiristik qýattylyǵynyń ósýine yqpal etedi»,-dedi Qanat Alpysbaev.
Baiandamalyshardy tyńdap, óz oiyn bildirgen Asqar Mamin Shymkent - respýblikanyń negizgi indýstriialyq, týristik jáne mádeni ortalyqtarynyń biri ekenin aityp, millionǵa jýyq halqy bar bul qalanyń damýyna Memleket basshysy da erekshe kóńil bóletinin atap ótti.
Ońtústik Qazaqstan oblysy - elimizdiń eń mańyzdy kóliktik haby ekenin aitqan Asqar Mamin kezdesý qorytyndysy boiynsha QR Investitsiialar jáne damý ministrligine áýejai men áýejai infraqurylymynyń tujyrymdamalyq damýy boiynsha usynystar ázirlep engizýdi tapsyrdy.
