Búginde aýyl sharýashylyǵy ónimderin molaityp, sapasyn arttyrý jáne mal sharýashylyǵyn damytý úshin tyń ǵylymi jetistikterdi igerý qajettiligi týyndaidy. Osy rette, sońǵy jyldary el arasynda aty jii atalyp júrgen «gidroponika» ádisin aitýǵa bolady, dep habarlaidy "Ult aqparat" OQO ákiminiń baspasóz qyzmetine silteme jasap.
Ońtústik Qazaqstan oblysyndaǵy «Qazagrogrin» kásiporny fermerlerdi mal azyǵymen qamtamasyz etýdiń innovatsiialyq tásilin usyndy. Bul jerde arpa 1 apta ishinde ósiriledi. Gidropondy mal azyǵynyń quramynda janýarlarǵa arnalǵan dárýmender men paidaly zattar bar.
2015 jyly óńirde jumys jasap keletin kásiporyn 0,5 jáne 1, 2 tonnalyq gidroponikalyq qondyrǵyny óndirip kelse, biyl jylyna 1460 tonna shamasynda jem-shóp shyǵarýǵa qaýqarly 4 tonnalyq jańa qondyrǵyny iske qosty. Osy ýaqyt ishinde kásiporyn óz qondyrǵylaryn oblystaǵy tórt iri sharýa qojalyqqa ornatqan. Al búginde tórt tonnalyq jańa qondyrǵyny «Atameken» sharýa qojalyǵyna ornatýda.
Sharýa qojalyqtar quny 29 jáne 72 mln teńge bolatyn qondyrǵyǵa «Ońtústik» AIO-nyń qarjylandyrýy arqyly qol jetkizip otyr. Endi innovatsiialyq tyń ádisti ornatamyn degen fermerge memleket 10 mln teńge kóleminde sýbsidiia bermek.
Jańa tehnologiianyń arqasynda jer jyrtyp, mal azyǵy az dep alańdamaisyz. Eńbek kúshin de talap etpeidi. Gidroponika ádisi arqyly kúnine 2 tonna ónim óndirýge bolady. Al, jylyna shamamen 1500 tonna jem-shóp jinaýǵa múmkindik bar.
Kásiporyn direktory Baqytjan Kópbaevtyń aitýynsha, gidroponika ádisi arqyly daiyndalǵan ónimder arpa daqylynyń qunarlyǵymen para-par eken. Jasyl jemdi paidalanǵan sharýa veterinarlyq aýrýlardy da birjolata umytady, - deidi ol. Osylaisha, sharýalar tórt túligine qarjy únemdep, taza, ári qunarly jemmen azyqtandyra alady.
