Ońtústik Qazaqstanda qysqa merzimdi kásiptik oqýdy aiaqtaǵan 100-ge jýyq adamǵa kýálik berildi. Olar «Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan baǵdarlamasy» aiasynda uiymdastyrylǵan úsh ailyq kýrsty sátti aiaqtady. Qatysýshylardyń basym kópshiligi tiginshilikti igerse, qalǵany elektr slesari mamandyǵyn meńgergen. Bul týraly oblystyq jumyspen qamtýdy úilestirý jáne áleýmettik baǵdarlamalar basqarmasynyń mamandary málim etti.
Úsh ai ishinde mamandyqty meńgergen azamattar turaqty jumysqa da ornalasty. Olar az ýaqyt aralyǵynda - biri tiginshi, biri elektr slesari mamandyǵyna mashyqtanyp aldy. Endi jumysqa kirisýge saqadai sai. Al Móldir Amantaeva tipti óz biznesin ashyp, súiikti isinen nápaqa tabýdy oilastyryp ta qoiǵan. Baǵdarlama qatysýshysy aldaǵy ýaqytta jeńildetilgen nesie alyp, qarajatqa jeke tigin tsehyn ashpaq niette.
Aita keteiik, oblysta baǵdarlamanyń birinshi baǵyty sheńberinde mamandyǵy joq azamattar eńbek naryǵynyń suranysyna orai kásiptik bilim alýǵa 4500, qysqa merzimdi kásiptik oqytýǵa 12 myńnan asa adam joldandy. Qysqa merzimdi kásiptik oqytýǵa joldanǵandardyń jartysyna jýyǵy oqýdy aiaqtap, 2 myńǵa jýyq adam jumysqa ornalasty deidi sala mamandary. Jergilikti bilik ókilderi oblysta baǵdarlamany óz deńgeiinde iske asyrý nátijesinde jumyssyzdar azaiyp, suranysqa ie mamandar qataryn tolyqtyryp otyrmyz deidi.
Aita keteiik, búginde óńirde suranysy zor tiginshi, santehnik, elektr slesari siiaqty bas-aiaǵy on bes mamandyqtyń tizimi jasaqtalyp otyr. Jumyssyzdyqpen kúresý maqsatynda qolǵa alynǵan baǵdarlama aiasynda osynaý mamandyqtarǵa azamattardy kysqa merzimdi kásiptik oqytý jospary óz deńgeiinde júrgizilýde deidi salaǵa jaýaptylar.
