QMDB-nyń Ońtústik Qazaqstan oblystyq ókildiginiń bastamasymen «Asar» qaiyrymdylyq sharasy aiasynda biyl óńirde 8 otbasyǵa baspana berilgen. Bul igi shara bolashaqta jalǵasyn tabatyn bolady. Budan bólek, jyl basynan beri 6500 otbasyǵa jalpy somasy 19 mln. teńgeden astam qarjy kómek retinde ulastyryldy. Búgin bul týraly OQO óńirlik kommýnikatsiialar qyzmetinde ótken brifingte Qazaqstan musylmandary dini basqarmasynyń OQO boiynsha ókil imamy Ahmetjan Kerimbek málim etti.
Sonymen qatar, QMDB-nyń óńirdegi ókildiginiń bastamasymen «Rýhani jańǵyrý» sharasy aiasynda Úndeý qabyldanǵan bolatyn. Onyń maqsaty - óńir turǵyndaryn únemshildikke úgitteý. Búgingi tańda bul bastama kópshilik tarapynan keńinen qoldaý taýyp keledi. Sondai-aq, qaiyrymdylyq sharalaryna kóbirek mán birilýde.
«Máselen, «Ýaqyp» korporativtik qaiyrymdylyq qory eń alǵash ret ózin-ózi qarajatpen qamtamasyz ete almaityn aýyl meshitterindegi qyzmetkerlerge kómek kórsetti. Qajettilikke orai ai saiyn beriletin kómektiń ortasha mólsheri 50-60 myń teńgeni qurady. Budan bólek, aldaǵy 2018 jyly oblystaǵy jalpy sany 1700-den astam meshit qyzmetkerlerine kómek berý josparlanýda», - dedi Ahmetjan Piráliuly.
Búgingi tańda Ońtústik Qazaqstan oblysynda 800-den astam meshit bar. Olarda 1800-ge jýyq qyzmetker jumys isteidi. Otyzdan astam din qyzmetkeri teris aǵym jeteginde ketken azamattarmen ýaǵyz-nasihat júrgizedi. Máselen, biylǵy jyly kereǵar aǵymdarmen jumys nátijesinde 70 azamat dástúrli dinge oralǵan. Sondai-aq, jastardyń durys tálim-tárbie alý maqsatynda oblystyq meshit janynan «Áiel jáne qyzdar» sektory men «Ájeler mektebi» ashylyp otyr.
Budan bólek, oblys aýmaǵynda «Shymkent», «Saryaǵash» medrese kolledjderi jumys istep keledi. Onda 370 shákirt bilim alyp jatyr. Onyń 175-i tegin oqý grantymen qamtylǵan. Bul óz kezeginde bilikti din mamandaryn daiarlaýǵa mol septigin tigizbek.
