Ońtústik Qazaqstan oblysynda biylǵy jyldyń 10 aiynyń qorytyndysy boiynsha paidalanýǵa berilgen turǵyn úidiń jalpy kólemi 526 myń sharshy metrdi (5 246 páter) quraǵan. Bul týraly OQO óńirlik kommýnikatsiialar qyzmeti uiymdastyrǵan kóshpeli brifingte Shymkent qalalyq qurylys bóliminiń basshysy Ábilseiit Rabaev málim etti dep habarlaidy "Ult aqparat".
Bul kórsetkish byltyrǵy jylmen salystyrǵanda 20,9 paiyzǵa artyp otyr. Al oblys ortalyǵy Shymkent qalasynda biyl jalpy aýmaǵy 302 myń sharshy metrlik 5 myńnan astam páter el igiligine beriledi.
Sonymen qatar, «Nurly jer» turǵyn úi baǵdarlamasy aiasynda oblysta qurylysy josparlanǵan 231 nysannyń jyl sońyna deiin 115-in paidalanýǵa tapsyrý mejelengen. Al jyldyń basynan 1-qarashaǵa deiin 61 nysan paidalanýǵa tapsyrylǵan. Qalǵan 54 nysan jyl sońyna deiin paidalanýǵa berilmek. Sondai-aq, Shymkent qalasynda biyl 201 turǵyn úidiń qurylysy júrgizilýde.
«Aita keterligi, Shymkentke jalpy quny 22,5 mlrd teńgege 46 turǵyn úidiń qurylysy júrgizilýde. Onyń ishinde ákimshilik-iskerlik ortalyǵynda 32, arendalyq 16, dál sondai nesielik 16 turǵyn úi salynýda. Budan bólek «Shymkent siti» shaǵyn aýdanynda jalpy 14 turǵyn úidiń qurylysy júrgizilip keledi», - dedi Ábilseiit Rabaev.
Sonymen qatar, «Turǵyn úi qurylys jinaq banki» AQ oblystyq filialy direktorynyń orynbasary Aqylbek Qospanovtyń aitýynsha, atalǵan bank júiesi boiynsha biyl óńirde 982 páter paidalanýǵa beriledi. Al 2018 jyly «Nurly Jer» baǵdarlamasy aiasynda oblys ortalyǵy Shymkent qalasynda 2 500-ge jýyq páter salý josparlanǵan.
«3-dárejeli baspananyń sharshy metri 140 myń teńge. Jalpy qazirgi tańda oblys boiynsha 57 myńǵa jýyq salymshylarymyz bar. Al olardan jinaqtalǵan soma 27 mlrd teńgeden asady. Sondai-aq, baspanany alýdyń tártibine toqtala ketsek, konkýrstan ótken salymshy úidiń jalpy qunynyń 30 paiyzyn jinaqtaý kerek. Qalǵan 70 paiyzyn bank 5 paiyzdyq mólshermen 6-15 jylǵa deiin nesiege beretin bolady», - dedi Aqylbek Qospanov.
Aita keterligi, «Nurly jer», «Nurly jol» baǵdarlamalary boiynsha halyqqa turǵyn úidiń qoljetimdiligin arttyrý barysynda paiyzdyq ústemeler 5 paiyzdan da tómendetildi.
