Alǵash ret Ońtústik Qazaqstan oblysynda bastaý alǵan «RIC ON KO’RME» atty jármeńke jalǵasyn tabýda. Ereksheligi – jármeńkede tek qana «OŃTÚSTIK» aimaqtyq investitsiialyq ortalyǵy jáne «Yrys» mikroqarjy uiymy arqyly qarjylandyrylǵan taýar óndirýshileri óz ónimderin naryqtan tómen baǵada satýǵa shyǵarady. Olar úshin oryndar tegin berilip, satýshyǵa da satyp alýshyǵa da kompaniia barlyq jaǵdaidy jasap berýde.
Maqsat: aýylsharýashylyǵy taýarlaryn halyqqa óndirýshi baǵasymen tikelei qoljetimdi etý, kásipkerler, tutynýshylar jáne kompaniia arasyndaǵy úsh jaqty beiresmi qarym-qatynasty nyǵaitý jáne jaqyndatý, qarjylandyrylǵan jobalardyń ónimderin tanymdy bolýyna yqpal jasaý jáne olardy ilgeriletý.
«OŃTÚSTIK» aimaqtyq investitsiialyq ortalyǵynyń Basqarma tóraǵasy Qýanysh Baitóre jáne «Yrys» mikroqarjy uiymynyń direktory Daniiar Arynǵazinnyń aitýynsha, endi bul jármeńke ər eki aptada bir ret ótkizilip turatyn bolady.
«Biz tek qana qarjy institýty emespiz, bizdiń kompaniia damý institýty bolyp esepteledi. Sondyqtan, biz kásipkerlerge tek qarjy berip qana qoimai, olardyń kásibin ári qarai ilgeriletýge jáne damytýǵa barynsha qoldaý kórsetemiz. Olar bizben biz olarmen birge ósemiz», - dedi Basqarma tóraǵasy Q. Baitóre.
Jármeńkede 35-40 shaqty kásipker óz taýarlaryn naryqtan tómen baǵamen satylymǵa shyǵarady. Olardyń ishinde azyq-túlik: et jáne sút ónimderi, balyq jáne shujyq ónimderi, jemis-jidek, kókónister basym bóligin quraidy. Odan bólek, jeńil ónerkásiptik taýarlar, qoldan jasalǵan buiymdar, qurylys materialdary, sondai-aq balalar úshin oiynshyqtar da bar. Eń bastysy bulardyń bári ońtústikte jasalynyp, bizdiń ortalyqpen qarjylandyrylǵan.
Aita ketý kerek, atalmysh shara Elbasymyzdyń halyqqa joldaýy, rýhani jańǵyrý aiasynda qolǵa alynyp, basqa da uiymdarǵa áleýmettik sharalardy ótkizýdi nasihattaýdy kózdeidi. Sondai-aq, «RIC ON KO’RME» ataýy kompaniianyń latyn álipbiine kóshýdi qoldaitynyn kórsete otyryp, óńir halqyn da latyn álipbiine kóshý kezeńine belsendi at salysýǵa shaqyrady.
Esterińizge sala keteiik, oblys ákimi J.Túimebaev azyq-túlik taýarlary baǵalaryn turaqtandyrý jáne taýar óndirýshiler men diqandarǵa óz ónimderin saýdalaýǵa múmkindik beretin áleýmettik bazar ashý boiynsha tapsyrma bergen bolatyn. Atalmysh shara, igi istiń bastaýy bolyp, áleýmettik bazarlardyń kóbeiýine tyń serpin beredi, dep kútilýde.
