Búgin Ońtústik Qazaqstan oblystyq máslihatynyń kezekten tys on jetinshi sessiiasy ótti. Jiynnyń kún tártibinde 3 másele qaraldy. Basqosýǵa oblys ákimi J.Túimebaev, oblystyq máslihat hatshysy Q.Balabiev, oblystyq máslihat depýtattary, qala jáne aýdan ákimderi, oblystyq, aýmaqtyq departament, basqarma basshylary men BAQ ókilderi qatysty, dep habarlaidy óńir basshysynyń baspasóz qyzmeti.
Sessiianyń jumysyn oblystyq máslihat sessiiasynyń tóraǵasy Q.B.Abasov júrgizip otyrdy.
Birinshi kezekte halyq qalaýlylary oblystyq maslihattyń «2017-2019 jyldarǵa arnalǵan oblystyq biýdjet týraly» sheshimine ózgerister men tolyqtyrý engizý jaiyn talqylady. Nátijesinde ishki ister departament qyzmetkerleriniń laýazymdyq jalaqylaryn 25 paiyzǵa ulǵaitý maqsatynda respýblikalyq biýdjetten 569,9 mln. teńge bólinetin bolyp bekitildi.
Sondai-aq, sessiia barysynda oblystyq máslihatynyń turaqty komissiialarynyń quramyna ózgerister engizý máselesi de qaraldy. Halyq qalaýlylarynyń kelisimimen oblystyq máslihaty komissiiasynyń quramy ózgerdi.
Ońtústik Qazaqstan oblystyq máslihaty sheshimimen Tasybaev Ábdirahman Batyrbekuly bergen ótinishine sáikes, 2017 jylǵy 30 qarashadan bastap, Ońtústik Qazaqstan oblysy boiynsha tekserý komissiiasynyń múshesi laýazymynan bosatyldy.
Óz kezeginde sóz alǵan óńir basshysy 2020 jylǵa qarai balalardy 100 paiyz balabaqshamen qamtý máselesine erekshe toqtaldy.
«Oblystyq biýdjet kólemi jalpy 518,1 mlrd. teńgeni qurap, ótken jylmen salystyrǵanda 32,4 mlrd. teńgege ósip otyr. Balalardy balabaqshalarmen qamtý deńgeiin 85,5 paiyzǵa jetkizý maqsatynda memlekettik bilim berý tapsyrystaryn ornalastyrýǵa qosymsha 1,9 mlrd. teńge baǵyttaldy. Ózderińiz biletindei, 2020 jylǵa qarai balalardy 100 paiyz balabaqshamen qamtý jónindegi Elbasynyń tapsyrmasyn oryndaý qajet» - dedi Janseiit Túimebaev.
Sessiiany qorytyndylaǵan oblys ákimi Janseiit Qanseiituly bilim berý, densaýlyq saqtaý, aýyl sharýashylyǵy jáne halyqty aýyz sýmen qamtý baǵytyndaǵy atqarylar máselelerge basymdyq berýdi tapsyrdy.
