OQO-da 9 áleýmettik dúken men saýda qatarlary ashyldy. Bul týraly búingi selektorlyq rejimde ótken apparattyq jiynda málim boldy, dep habarlaidy "Ult aqparat" ákimniń baspasóz qyzmetine silteme jasap.
Qazirgi tańda baǵa turaqtyly kún tártibindegi basty másele ekenin aitqan aimaq basshysy azyq-túlik taýarlarynyń baǵalaryn negizsiz ósirgen azamattar jaýapqa tartylatynyn qatań túrde eskertti. Sonymen qatar, barlyq aýdan, qaladan taýar óndirýshiler men diqandarǵa óz ónimderin saýdalaýǵa múmkindik beretin áleýmettik bazar ashýdy tezdetip qolǵa alýdy tapsyrdy. Jáne de ol bazarlarda «Ońtústik» AIO men «Yrys» mikroqarjy uiymy qarjylandyrylǵan jobalardyń ónimi saýdalanýyn mindettedi.
Esterińizde bolsa, ótken aptadaǵy selektorlyq jiynda baǵa turaqtylyǵyn saqtaý maqsatynda aimaq basshysy otandyq taýar óndirýshilerdiń saýdalanatyn áleýmettik bazar ashýdy aýdan, qala ákimderine tapsyrǵan bolatyn. Osynyń negizinde Túlkibasta 4, Tóle bi aýdanynda 3 áleýmettik dúken men saýda qatarlary, al Túrkistan qalasynda saýda oryndary ashylyp otyr.
Jiynda sóz alǵan oblys ákiminiń orynbasary B.Jamalov búginde oblysta qajetti degen 19 azyq-túlik baǵasynyń turaqty ekenin aityp, basqa oblystarmen salystyrǵanda baǵa kórsetkishi boiynsha 6 orynda ekenin jetkizdi. Sonymen qatar, janar-jaǵarmai men dizel otyny jetkilikti ekenin atap ótti.
«Búgingi tańda oblysta baǵa ósý qaýpi tek qana siyr eti men taýyq etiniń ósimi bar. Qalǵan azyq-túlik baǵasynda ósý qaýpi baiqalmaidy. Turaqtandyrý qorynda da qajetti azyq-túlik jetkilikti. Búgingi tańda qorda - 1 myń tonna qant, 2 myń tonna kartop, 1 myń tonna piiaz, sábiz 1 200 tonna, kúrish 70 tonna, al siyr eti 200 jáne 30 tonna makaron ónimderi bar», - dedi B.Jamalov.
Aita keteiik, Ońtústik Qazaqstanda jergilikti taýar óndirýshilerdiń tanymaldylyǵyn arttyrý jáne baǵa turaqtylyǵan saqtaý maqsatynda alǵash ret «Ońtústik» aimaqtyq investitsiialyq ortalyǵy men «Yrys» mikroqarjy uiymy qarjylandyrǵan jobalardyń aptalyq jármeńkesi bastaý alǵan bolatyn.
Endi eki aptada bir ótetin jármeńkede jeńildetilgen nesie alyp, kásibin júrgizgen 40-qa jýyq kásipker halyqqa otandyq ónimderin tómen baǵada usynatyn bolady. Aita keteiik, atalǵan qarjy uiymdary jyl basynan beri 2182 jobany qarjylandyrǵan.
