Búginde elimizde advokattar tapshylyǵy sezilip otyr. Ortasha eseppen alǵanda 1 advokatqa shashamen 4000 azamattan keledi. Búgin bul týraly OQO Óńirlik kommýnikatsiialar qyzmetinde ótken baspasóz máslihatynda Ońtústik Qazaqstan oblysy Ádilet departamenti basshysynyń mindetin atqarýshy Muhit Turǵaraev málim etti, dep habarlidy QazAqparat.
Máslihat barysynda qoǵamdyq talqylaýǵa túsip jatqan advokattyq qyzmet pen quqyqtyq kómek týraly keibir zańnamalyq aktilerge ózgerister men tolyqtyrýlar engizý týraly zań jobalarynyń tujyrymdamalary túsindirildi.
Statistikalyq málimetterge súiensek, sońǵy 4 jyldyń ishinde advokattar sany tek 300-ge ǵana ósken. Óitkeni advokat ataný ońai sharýa emes. Ol úshin zańgerlik joǵary biliminiń bolýy, advokattar alqasynda 6 ai nemese 1 jylǵa deiin taǵylymdamadan ótýiń tiis. Taǵlymdamadan ótýdiń jyldyq quny - 140 myń teńgeden 280 myń teńgeniń kóleminde. Sondai-aq, ár aimaqta alqaǵa kirý úshin alǵashqy jarna somasy 800 myń teńge bolyp belgilengen. Osylaisha úmitkerge advokat mártebesin alý úshin orta eseppen 1 mln teńge tóleýi qajet. Muhit Beketuly advokattar tapshylyǵynyń negizgi sebepteri retinde osy túitkilderge toqtaldy.
«Mamandyqqa kirýdi jeńildetý maqsatynda jańa ázirlenip jatqan zań jobasynda jarna tóleý máselesi alynyp tastalatyn bolady. Bul advokattar sanynyń ósýine, olardyń arasyndaǵy básekelestikti kúsheitip, qalamaqyny tómendetip, olardyń kásibi deńgeiin joǵarylatýǵa yntralandyrady», - deidi Muhit Turǵaraev.
Taǵy bir túitkildi máseleniń biri - bul alqalardyń qarjylyq qyzmetiniń ashyqtyǵy. Iaǵni, jańa zań jobasyna advokattar alqalarynyń kirister men shyǵystary týraly aqparatty mindetti túrde jariialaý engiziletin bolady. Sondai-aq, jańa zań aiasynda advokattardyń mindetti jyldyq kásibi biliktiligin arttyrý isi de qolǵa alynbaq. Bul rette Frantsiia, Ulybritaniia, AQSh elderiniń tájiribesi qoldanylatyn bolady.
Budan bólek, halyqtyń áleýmettik osal toptaryna tegin zańgerlik kómek kórsetý maqsatynda «Pro bono» tájiribesin engizý qarastyrylýda. Ol úshin advokattarǵa jylyna tegin zań kómegin berý quqyǵy usynylady.
Sonymen qatar, jeke tájiribeshilerdiń quqyqtyq mártebesin, olardyń quqyqtary men mindetterin anyqtaýdy zańdy túrde belgileý isi qolǵa alynbaq. Iaǵni, ózin-ózi retteitin uiymdardy advokattyq palatalar túrinde qurý josparlanyp otyr. Onda zańgerlik kómek kórsetetin jeke tulǵalar men zańgerlik keńes beretin advokattar úshin óz erkimen zań keńesshileriniń palatasyna kirýge quqyq beriledi. Jalpy alǵanda, zań jobalarynyń tujyrymdamalary azamattarǵa qoljetimdi jáne sapaly quqyqtyq kómek kórsetýge baǵyttalǵan.
