Ońtústik Qazaqstan oblysynda ústimizdegi jyldyń on aiynda 16 mln 400 myńnan astam qyzmet kórsetilse, sonyń 7 milliony elektrondy túrde usynylǵan. Bul týraly ákimdiktiń selektorlyq otyrysynda oblys ákiminiń apparat basshysynyń orynbasary Qanat Tólendiev málim etti. Qazirgi tańda oblystyq jergilikti atqarýshy organdar tarapynan 192 qyzmet túri kórsetiledi. Aǵymdaǵy jyldyń 10 aiynyń qorytyndysy boiynsha 7 027 180 qyzmet elektrondy túrde kórsetilgen. Bul jalpy kórsetilgen qyzmetterdiń 42,8 paiyzyn quraidy, dep habarlaidy Ult.kz tilshisi.
«Kórsetilgen qyzmetterdiń 80 paiyzy densaýlyq saqtaý salasyna tiesili jáne osy saladaǵy qyzmetterdiń elektrondy úlesin arttyrý eleýli ózgeristerge ákeletini belgili», - Qanat Tólendiev.
Sońǵy 10 aidyń qorytyndysy boiynsha Halyqqa qyzmet kórsetý ortalyqtary arqyly 541 816 elektrondy qoltańba berilgen. Alaida elektrondy qyzmetterdiń úlesi áli de tómen. Sebebi qyzmet usynýshy memlekettik organdar tarapynan elektrondy qyzmetterdi alý joldary turǵyndarǵa óz deńgeiinde nasihattalmaidy. Budan bólek, aqparattyq júieler arqyly kelgen ótinimderdi tirkemei, tikelei, memlekettik organnyń keńsesi arqyly kórsetý faktileri oryn alýda.
«Memlekettik qyzmetkerdiń jumysynda eń basty kórsetkish - halyqqa durys qyzmet kórsetý. Ekinshi - ýaqytynda ári qysqa merzimde qyzmet kórsetýge umtylýymyz qajet. Bul rette aýdan basshylary jumysyn kúsheitýi tiis. Sizderdiń jumystaryńyzdyń indikatoryna bul da kiredi. Sondai-aq, elektrondy túrde qyzmet kórsetý sapasyn jaqsartyp, shalǵai aýyldardaǵy qyzmet túrlerin «Qazpochta» bólimsheleri arqyly jolǵa qoiýdy tapsyramyn», - dedi Janseiit Qanseiituly.
«Damý» baǵdaralamasyn iske asyrý is-shara josparyna sáikes elektrondy túrde kórsetiletin memlekettik qyzmetterdiń kórsetkishi áli de bolsa tómen. Atap aitqanda, Báidibek, Qazyǵurt, Sozaq, Sairam, Shardara aýdandarynyń kórsetkishteri kóńil kónshitpeidi. Osy olqylyqtardy túzetý jóninde atalǵan aýdan basshylaryna oblys ákimi tarapynan naqty tapsyrmalar júkteldi.
