Ońtústik Qazaqstan oblysynda búgingi tańda 557 143 avtokólik tirkelgen. Salyq kodeksine sáikes, 59 265 avtokólik ielerinde jeńildik bar. Qazirgi tańda oblys kóleminde tólenbegen kólik salyǵyn óndirý boiynsha jumystar atqarylýda. Búgin bul týraly OQO óńirlik kommýnikatsiialar qyzmetinde ótken brifingte oblystyq Memlekettik kirister departamentiniń basshysy Altynsary Úmbetaliev málimdedi, dep habarlaidy "Ult aqparat" óńir basshysynyń baspasóz qyzmetine silteme jasap.
Sondai-aq, mindetti áleýmettik meditsinalyq saqtandyrý júiesine azamattardyń óz erikterimen oblys kóleminde 1,6 mlrd teńge jarna túsken. Salymshylardyń basym bóligi memlekettik biýdjetten qarjylandyratyn mekemelerden jáne kásiporyndardan túsip otyr.
Departament basshysynyń aitýynsha, oblysta «Tsifrli Qazaqstan» memlekettik baǵdarlamasy aiasynda «Salyq jáne kedendik ákimshilendirýdi tsifrlandyrý» pilottyq jobasy iske asyrylýda.
«Jańa júieniń engizilýi - tapsyratyn qujattardyń azaiýyna, ýaqytty únemdeýge úlken múmkindik beredi. Pilottyq jobanyń aiasynda «Astana-1» aqparattyq jańa júiesi qoldanysqa engizildi. Atalǵan júie barlyq keden beketterine ornatylyp, búgingi tańda 6 myńǵa jýyq tranzittik deklaratsiia rásimdelgen», - dedi Altynsary Dúisenbekuly.
Sonymen qatar, oblys ortalyǵy Shymkent qalasynda ótken Qazaqstan-Ózbekstan delegatsiiasynyń ekijaqty kelisimine sáikes, «Atameken» keden beketiniń «Syrdaria» jáne «Tselinnyi» ótkizý pýnktteri ashylyp otyr.
«Qazirgi tańda «Qazyǵurt», «Qaplanbek» jáne «Atameken» keden beketterin táýlik boiy jumys kestesine kóshirip, shekaradan ótetin taýarlar men kólik quraldaryn resimdeýdi jyldamdatýǵa qol jetkizip otyrmyz. Sondai-aq, ótkizý pýnktteri arasyndaǵy joldar men kópirlerdi keńeitip, jeke tulǵalarǵa shekaradan ótýge yńǵaily jaǵdai jasaityn bolamyz. Aita keterligi, aǵymdaǵy jyldyń 9 aiynda Qazaqstan men Ózbekstan arasyndaǵy taýar ainalymy 554 mln. AQSh dollaryn qurady», - dedi Altynsary Dúisenbekuly.
Búgingi tańda oblystyq Memlekettik kirister departamenti salyq jáne basqa da tólemderdiń tolyq jáne ýaqytyly túsýin qamtamasyz etip qana qoimai, biznes ortany túbegeili jaqsartyp, oǵan ońtaily jaǵdai jasaý baǵytynda birqatar jumystar atqaryp keledi.
