Almaty qalasynda Qazaqstan boks federatsiiasynyń kýbogy úshin VIII maýsymdyq jarystardyń jeńimpazdary anyqtaldy. Aqtyq básekege joldama alǵan Ońtústik Qazaqstan men Mańǵystaý oblysynyń sportshylary ózara myqtyny anyqtady, dep habarlaidy "Ult aqparat".
Aita keteiik, Mańǵystaýlyq boksshylary 2012 jáne 2016 jyly kýbokty jeńip alsa, OQO komandasy 2015 jyly jeńimpaz atanǵan bolatyn. Aqtyq saiysta 52 keli salmaqta mańǵystaýlyq boksshy jaraqatyna bailanysty oiynnan shyǵyp, OQO komandasyna bir upai jazyldy. Sóitip boksshy Shalqar Aiqynbai jeńimpaz bolyp tanyldy. Tartysty ótken básekede mańǵystaýlyq boksshy, álem chempionatynyń júldegeri, Aziia chempiony, olimpiadaǵa qatysýshy Berik Ábdirahmanov pen Sultan Zaýyrbektiń oiyny boldy. Eki sportshy da sharshańqyrap qalǵandaryna qaramastan qaitpai judyryqtasty.
Alaida qarsylasynan 10 jas úlken mańǵystaýlyq boksshynyń óz ózine degen senimdiligi jeńiske jetkizdi. Mańǵystaýlyq komandaǵa upaidy sonymen qatar Nulbol Qaljanov pen osy jyly ótken Aziia chempionatynyń kúmis júldegeri Erik Áljanovtar da qosyp úlgerdi. Degenmen bul jolǵy jeńis ońtústiktiń sportshylaryna buiyrdy. Shalqar Aiqynbaiden keiin ringke Aziia oiyndarynyń júldegeri Baǵdáýlet Ibragimov pen Bekzod Halmetov, Bek Nurmaǵambet, Erkin Muhametjan shyqty. Erkin Muhamedjan oblysqa altynshy upai alyp berse, Nurjan Bekzatov ta qarsylasynan basym tústi. Qorytyndy esep 7:3 bolyp, ońtústiktiń bylǵary qolǵap sheberleri jeńiske jetti.
Osylaisha Ońtústik Qazaqstan oblysynyń boksshylary ekinshi ret Qazaqstan kýbogynyń jeńimpazy atanyp, 25 mln teńge utyp aldy.
«Biz komanda sapynda negizinen jas boksshylardy alyp keldik. Olar jas ta bolsa tájiribeli sportshylar sanalady. Beseýi halyqaralyq dárejedegi sport sheberleri bolsa, ózgeleri sport sheberleri. Al utyp alǵan 25 mln teńgeni óńirde boksty damytý maqsatynda jumsamaqpyz. Atap aitqanda komandanyń jattyǵýyna kerek-jaraqtyń bárin satyp almaqpyz», - dedi OQO komandasynyń bas bapkeri Nurlan Aitýarov.
