Ońtústik Qazaqstan oblysynyń ákimi Janseiit Túimebaev Jumat Shaninniń 125 jyldyq mereitoiyna arnalǵan «Teatr dánin tamyrlatqan tarlan» atty eske alý saltanatty keshine kelgen qonaqtarmen kezdesti, dep habarlaidy óńirlik ákimdiktiń baspasóz qyzmeti.
Olardyń qatarynda teatr tarlanynyń týǵan nemereleri «Túrik áleminiń rýhani murasy» qoǵamdyq qorynyń tóraǵasy Bolat Shanin, Raihan men Janat Qasymhanqyzdary da bar.
Kezdesýde sóz alǵan óńir basshysy biyl oblysymyzda qazaqtyń tuńǵysh halyq ártisi, kásibi rejisseri, dramatýrg Jumat Shaninniń 125 jyldyǵyna orai 30-ǵa jýyq mádeni is-sharalardyń joǵary deńgeide atalyp ótkenin jetkizdi.
«Qazaq halqynyń teatr ónerin damytýda Jumat Shanin atamyzdyń eńbegi ushan teńiz. Qazaqtyń birtýma perzenti ult teatrynyń negizin qalap, kásibi turǵyda qalyptastyryp, sahnalyq-shyǵarmashylyq jaǵynan ósý jolynda zor eńbek sińirdi. Teatr tarlanynyń 125 jyldyǵyna orai aǵymdaǵy jyldyń basynda oblys ákimdigi tarapynan is-sharalar jospary túzilip, arnaiy jumysshy top qurylǵan bolatyn. Biylǵy jyldyń sáýir aiynda Túrkistan men Shymkent qalasynyń teatrlarynda «Túrkistan - Túrki áleminiń mádeni astanasy» jylynyń aiasynda Túrki áleminiń teatrlar festivali ótkizildi», - dedi Janseiit Qanseiituly.
Teatr tarlanynyń 125 jyldyǵyna orai biyl oblysymyzda «Qazaq teatrynyń atasy», «Teatr tarlany», «Tuńǵysh rejisser, dramatýrg, teatr qairatkeri», «Tulpardyń tuiaǵy, asyldyń synyǵy», «Jaryq juldyz - Jumat Shanin», «Teatr jáne kórermen» taqyryptarynda kórmeler, kezdesýler ótkizilgen bolatyn. Atalǵan is-sharalarda Jumat Shaninniń ómir joly, eńbek joly, adam ómirindegi teatrdyń atqaratyn róli jaiynda keńinen nasihattaldy. Osy is-sharalarǵa erekshe qoldaý bildirgen oblys ákimine Jumat Shaninniń nemereleri shyn rizashylyǵyn bildirdi.
«Biyl Ońtústik Qazaqstan oblysynda atamyzdyń 125 jyldyq mereitoiy joǵary deńgeide atalyp ótýde. Kóktemde ózińizdiń jeke qabyldaýyńyzda bolyp, is-sharalar jospary týraly aqyldasqan bolatynbyz. Mine, birneshe aidan soń sol aitylǵan, josparlanǵan dúnielerdiń iske asyp otyrǵanyn kórip otyrmyz. Osy rette atamyzdyń mereitoiyn ótkizýge atsalysyp, erekshe qoldaý bildirgenińiz úshin riiasyz alǵysymyzdy bildiremiz», - dedi Raihan Qasymhanqyzy.
Kezdesý sońynda óńir basshysy Jumat Shanin atamyzdyń nemerelerine arnaiy syi-siiapat jasap, «Teatr dánin tamyrlatqan tarlan» atty eske alý keshiniń sátti ótýine tilektestigin bildirdi.
Atap ótý kerek, Jumat Shanin atyndaǵy qala kóshesinde uly tulǵaǵa arnalǵan memorialdy taqtasynyń ashylý saltanaty jáne teatr sahnasynda Jumat Shaninniń 125 jyldyq mereitoiyna arnalǵan «Teatr dánin tamyrlatqan tarlan» atty eske alý keshi ótedi.
