Búgin Ońtústik Qazaqstan oblysynyń ákimi Janseiit Túimebaev Túrki álemi ádebi jýrnaldary redaktorlarymen kezdesti, dep jazady "Ult aqparat" ákimdiktiń baspasóz qyzmetine silteme jasap.
Qonaqtardyń arasynda «TÚRKSOI» halyqaralyq uiymynyń Bas hatshysynyń orynbasary Fyrat Pýrtash, Eýraziia Jazýshylar Odaǵynyń tóraǵasy Iakýb Omerogly, «Bashqurtstan qyzy» jýrnalynyń redaktory Gúlnaz Kýtýeva, «Ázirbaijan» jýrnalynyń redaktory Sýdaba Agabalaeva, «Juldyz» jýrnalynyń bas redaktory, Memlekettik syilyqtyń iegeri, aqyn Ulyqbek Esdáýlet, jazýshy, «Qazyǵurtkz» jýrnalynyń bas redaktory Marhabat Baiǵut jáne t.b. 19 elden 10-ǵa jýyq ádebiet jáne mádeniet qairatkerleri bar.
Kezdesýde sóz alǵan oblys ákimi Túrki álemi ádebi jýrnaldary redaktorlarynyń VIII-shi kongresiniń tabysty ótýimen quttyqtady.
«Elbasymyz Nursultan Ábishuly Nazarbaev: «TÚRKSOI» túrki áleminiń IýNESKO-syna ainalýy tiis» degen bolatyn. Iaǵni, biz TÚRKSOI uiymyna múshe elder arasynda yntymaq-birligimizdi arttyryp qana qoimai, mádeni jáne ekonomikalyq, týristik turǵyda sony serpin alarymyz, sergek tartarymyz sózsiz. Keshegi ótken jiynda saliqaly sózder, utymdy usynystar aitylyp, ornyqty oilar ortaǵa salyndy dep oilaimyn», - dedi Janseiit Qanseiituly.
Kezdesýde sóz alǵan qonaqtar Túrki álemi ádebi jýrnaldary redaktorlarynyń VIII-shi kongresinde aitylǵan usynystar men qozǵalǵan pikirler túrki tildes halyqtardyń ortaq tarihyn integratsiialaýǵa zor yqpalyn tigizedi degen senim bildirdi.
«Túrkistan qalasynda keremet basqosý ótti. Jiynda Túrki dúniesine ortaq dúnieler ortaǵa salyndy. Sonyń biri retinde Qazaqstannyń latyn álipbiine kóshýi talqylandy. Latyn álipbiine kóshý - sizderdiń tilderińiz úshin jasalǵan igi qadam dep bilemin. Túrki Elderiniń aqsaqaly N.Nazarbaevtyń bul bastamasy der kezinde kóterilip otyr», - dedi Eýraziia Jazýshylar Odaǵynyń tóraǵasy Iakýb Omerogly.
Kezdesý barysynda qonaqtar latyn tiline kóshý máselesi týraly oilaryn ortaǵa salyp, óz ana tilderinde bir-bir shýmaqtan óleń oqyp berdi. Óńir basshysy qonaqtarǵa rizashylyǵyn bildirip, syi-siiapat kórsetti.
