Ońtústik Qazaqstan oblysynyń ákimi J.Túimebaev barsha ońtústikqazaqstandyqtardy Qazaqstan Respýblikasynyń Tuńǵysh Prezidenti kúnimen quttyqtady, dep habarlaidy oblys ákiminiń baspasóz qyzmeti.
«Qurmetti jerlester! Barshańyzdy halqymyz úshin mańyzy zor mereke - Tuńǵysh Prezident kúnimen shyn júrekten quttyqtaimyn.
1 jeltoqsan – Qazaqstannyń táýelsizdik alýyna, el eńsesiniń kóterilýine, halyq armanynyń oryndalýy men memleketimizdiń qarqyndy damýyna irgetas bolyp qalanǵan kún. Búgingi mereke elimizdiń tarihi tańdaý jasap, taǵdyrly sheshim qabyldaǵan – Qazaqstan Respýblikasynyń Prezidentin alǵash ret sailaǵan kúni. Osyndai taǵylymdy meiram qarsańynda oblys aýmaǵynda kóptegen igi ister atqarylýda.
Nursultan Ábishulynyń syndarly saiasatynyń arqasynda elimiz ekonomikalyq reformalardy júzege asyryp, nátijesinde qazir biz turmysy túzelgen, halqynyń ál-aýqaty jasqarǵan memleketterdiń qataryna qosyldyq. Tuńǵysh Prezidentimiz qiyn-qystaý kezeńderde ult bolashaǵyn, halyqtyń keleshegin aiqyndaityn qadamdarǵa baryp, qýaty jaǵynan álemde tórtinshi orynǵa ie iadrolyq qarýdan erikti túrde bas tartý arqyly dúniejúzinde adamzattyq turǵydaǵy úlgili qadamǵa bardy. Osy kóregen saiasattyń arqasynda qazaq halqynyń shynymen de beibitshilik súigish el ekendigi álemge pash etildi. 1995 jyly Elbasynyń bastamasymen qurylǵan Qazaqstan halqy Assambleiasy osy jyldar aralyǵynda óziniń qajettiligin talai ret dáleldedi. Ishki birlikti saqtaý arqyly jalpyulttyq tutastyqqa, tutastyq arqyly damýdyń dańǵyl jolyn tańdaýymyzǵa temirqazyq bola bildi.
Qazaqstandyqtar N.Á.Nazarbaevtyń kóregendi kósemdiginiń nátijesinde tarihi tabystarǵa qol jetkizdi. Búginde halyqaralyq qaýymdastyq Qazaqstandy óńirlik kóshbasshy, tatý kórshi, senimdi áriptes retinde qurmettep, elimizdiń ósip-órkendeýin oń baǵalaýda. Memleket basshysynyń ekonomikalyq yntymaqtastyq jáne damý uiymdaryna kirý baǵyty jónindegi sheshimi de joǵary deńgeidegi memlekettik menedjmenttiń tamasha úlgisi retinde baǵalanyp otyr. Sizderdi senim men izgi tilektiń bastaýy bolǵan – «Qazaqstan Respýblikasynyń Tuńǵysh Prezidenti kúni» merekesimen quttyqtai otyryp, myqty densaýlyq, otbasylaryńyzǵa amandyq, baq-bereke tileimin!», - dedi oblys ákimi.
